ने. सं. ११४३ ञलागा चौथी -

विघटनया विरोध याःपिंत प्रम ओलीपाखें आलोचना

येँ (नेपालभाषा टाइम्स)- प्रधानमन्त्री केपी शर्मा ओलीं संसद विघटनया विपक्षय् न्ह्यःने वःपिं पुलांपिं प्रधानन्यायाधीश व नागरिक समाजया न्ह्यलुवातय् आलोचना यानादीगु दु । म्हिगः च्वंगु राष्ट्रियसभाया बैठकय् सम्बोधन यायेगु झ्वलय् वय्कलं अदालतयात स्वतन्त्र ढंगं ज्या यायेगुली पंगः थनेगु ज्या जुयाच्वंगु खँ धयादीगु दु ।

पुलांपिं प्रधानन्यायाधीशपाखे संकेत यासें वय्कलं धयादिल, ‘पुलांपिं प्रधानन्यायाधीशपिंसं स्वतन्त्र न्यायालययात हाथ्या बिउगु दु, उमिसं गज्याःगु न्याय चाहे जूगु खः ?’ वय्कलं छम्ह वकिलं प्रधानन्यायाधीशयात वर्तमान व भविष्य लुमंकाः फैसला या धकाः धाःगु धासें धयादिल, ‘अराजकताया नं हद जुइ नि ।’

वय्कलं थः व थम्हं नेतृत्व यानाच्वंगु नेकपा व सरकारं अदालत, शक्ति पृथकीकरणया सिद्धान्तयात नालेगु जुइ धासें बुद्धिजीवी धाइपिसं नं राजनीतिक पक्षधरता क्यनाच्वंगु व न्यायालययात दबाब बियाच्वंगु द्वपं बियादिल । म्हिगः राष्ट्रिय सभाया बैठकय् सम्बोधन यायेत प्रम ओली बैठक कक्षय् प्रवेश जुइवं नेकपा प्रचण्ड-नेपाल पुचःया सांसदतय्सं राष्ट्रियसभा बैठक बहिष्कार याःगु खः । छघौत्या स्वयां अप्वः न्ह्याःगु बैठकया शुरुइ हे प्रधानमन्त्री ओलीं ब्वति कयादीगु खः ।

प्रधानमन्त्री ओली बैठकय् दुहां वयेवं प्रचण्ड-नेपाल पुचःया सांसदपिं पिहां वंगु खः । संसद विघटन याःम्ह प्रधानमन्त्री बैठक कक्षय् दुहां वयेवं थःपिं अन च्वनेगु औचित्य मदुलिं प्रमया सम्बोधन बहिष्कार यानागु खँ नेकपाया सांसद भेदुराम भुसालं कनादिल । वंगु पुस १७ गते न्ह्याःगु राष्ट्रियसभाया बैठक झिन्हुया दुने क्वचाःगु दु। झिन्हुया दुने प्यक्वः बैठक च्वंगु दुसा मुक्कं बैठकया ई ७ घन्टा ५ मिनेट न्ह्याःगु दु। उकथं हे राष्ट्रपतिं जारी याःगु थीथी न्हय्गू विधेयक राष्ट्रियसभाय् पेश जूगु दु । झिन्हुया दुने राष्ट्रियसभाय् पेश जूगु विधेयक मध्ये संवैधानिक परिषदया काम कर्तव्य व अधिकार सम्बन्धी न्हापांगु संशोधन अध्यादेश, नेपाल प्रहरी तथा प्रदेश प्रहरीया कार्य सञ्चालन सम्बन्धी अध्यादेश, सामाजिक सुरक्षा अध्यादेश, तेजाब नापं मेगु घातक रासायनिक पदार्थया नियमन सम्बन्धी अध्यादेश, वासः सम्बन्धी संशोधन अध्यादेश, हिंसा विरुद्ध छुं नेपाल ऐन संशोधन अध्यादेश व फौजदारी कसुर तथा फौजदारी कार्यविधि सम्बन्धी अध्यादेश राष्ट्रपतिं जारी याःगु खः ।