न्याम्ह नेतातय्सं आः छु याइ ?

येँ (नेपालभाषा टाइम्स) – सत्तारुढ नेपाल कम्युनिष्ट पार्टीया नेतातय् दथुया ल्वापु क्वमाइगु हे खनेदयावःगु दु । प्रधानमन्त्री केपी ओली पार्टी सचिवालयया बहुमत न्याम्ह नेतातय्सं सचिवालय बैठक सःतते याःगु मागयात तकं अस्वीकार यायेवं आः थ्व न्याम्ह नेतातय्सं छु याइ धयागु न्ह्यसः नं ब्वलंगु दु ।

म्हिगः नेकपाया कार्यकारी अध्यक्ष पुष्पकमल दाहाल लिसें वरिष्ठ नेतातय माधव नेपाल, झलनाथ खनाल, बामदेव गौतम व प्रवक्ता नारायणकाजी श्रेष्ठ प्रधानमन्त्री निवास हे वनाः ओलीयात सचिवालय बैठक च्वनेगु तिथि क्वःछिइत धाःवंगु खः । तर ओली अझ नं सचिवालय बैठक सःतेत तयार मजू । ओली बैठक सःतेत तयार मजुइवं आः न्याम्ह नेतातय्सं कार्यकारी अध्यक्ष प्रचण्डयात हे बैठक सःतके बी की मबी धयागु चर्चा सुरु जूगु दु। प्रधानमन्त्री ओलीं थ्वयां न्ह्यव कार्यकारी अध्यक्ष प्रचण्डं ओलीयात सचिवालय् बैठक च्वनेत धाःबलय् थःगु सहमति विपरीत औपचारिक रुपं सचिवालय बैठक सःतल धाःसा पार्टी कुचा जूगु सरह जुइ धकाः तकं प्रचण्डयात धयाहःगु खः ।

ओलीया थज्याःगु ख्याच्वः वःगुलिं प्रचण्ड-माधव पक्षया न्याम्ह नेतात वनाः ओलीयात बैठक सःतेत इनाप याःवंगु खःसां न्याम्ह नेताया न्ह्यःने नं ओली बैठक सःतेत तयार मजूगु खः । आः ओली तयार मजूगु अवस्थाय् बैठक सःतल धाःसा पार्टी कुचा जुइगु लँय् हे न्ह्याइगु खनेदु । अथे जूगुलिं आः बहुमतया बलय् न्याम्ह नेतातय्सं सचिवालय् बैठक सःतके बी कि बी मखु धयागु चर्चा जुयावःगु दु। पार्टी कुचा मजुइकेगु खःसा ओलीया हैकम व खँ हे न्यनाच्वनेमालीगु अवस्था जुयाच्वनी, सःतल धाःसा पार्टी कुचा जुइगु अवस्था वइ । आः न्याम्हं नेतात थ्व हे अन्योलय् लानाच्वंगु दु ।

थ्वहे दथुइ प्रवक्ता नारायणकाजी श्रेष्ठं थःपिंसं सोमवाः तकया दुने सचिवालय बैठक सःतेत धयाथकागु खँ धयादीगु दु। ओलीं धाःसा सचिवालय बैठक सःतेत सहलह ब्याकेमानि धकाः तिथि क्वःछिइत असहमति प्वंकूगु खः । म्हिगः बैठक सःतेत माग यानाः पौ हे ज्वनावंपिं न्याम्ह नेता व प्रधानमन्त्री ओली दथुइ आरोप प्रत्यारोप जुयाः ल्वापु थें हे जूगु खः । ओलीं प्रचण्डयात झेली यानाजूगु खँ धाःगु खःसा प्रचण्डं ओलीं स्थायी कमिटीया निर्णय तकं माने मयासे एकलौटी यानाजूगु द्वपं बिउगु खः ।

अथेहे माधव नेपाल, झलनाथ खनाल, बामदेव गौतम व नारायणकाजी श्रेष्ठं नं ओलीं सुयागुं खँ मन्यँसे थः यःयःथे सरकार व पार्टी चले यानाच्वंगु धासें प्रतिवाद याःगु खः ।