ने. सं. ११४६ बछलागा तृतीया -

पीडितया पक्षय् जनप्रतिनिधितय् ऐक्यवद्धता

येँ – गुह्येश्वरीनिसें गोकर्ण देगःयाथाय् तक वनेगु लँय् लाःगु खुसिया सौन्दर्यीकरणया ज्यायात स्थानीय किसानतय्सं अवरुद्ध याना बिउगु दु । कागेश्वरी मनोहरा व गोकर्णेश्वर नगरपालिकाया बागमति पीडित किसानतय्सं उगु लागाया खुसि सौन्दर्यीकरणया ज्याय् पंग थःगु खः ।
उखे मनोहरा व गोकर्णेश्वर नगरपालिका पीडित किसानतय्सं खुसिया सौन्दर्यीकरण यायेगु ज्याय् थंगु पंगयात जनप्रतिनिधितय्सं तकं समर्थन याःगु दु ।

बागमतिपीडित संघर्ष समितिं जोरपाटीइ ग्वसाः ग्वःगु अन्तक्र्रिया ज्याझ्वलय् जनप्रतिनिधिं समितिं न्ह्याका वयाच्वंगु आन्दोलनप्रति एक्यवद्धता प्वंकुसे किसानया पक्षय् न्यायया निंतिं पहल यायेगु प्रतिवद्धता तकं प्वंकूगु दु ।

येँ क्षेत्र नं ३ या प्रतिनिधिसभा सदस्य कृष्ण राई बागमति आयोजनाया नामय् पीडित किसानया पक्षय् दँदँ न्ह्यवंनिसें सः तया वयाच्वनागु खःसां इमिगु माग पूवंकेगु खँय् ध्यान बियामच्वंगु धयादिल । वय्कलं थः पीडिततय्त न्याय बीगु निंतिं किसानतलिसें प्रतिनिधिमण्डल ज्वनाः प्रधानमन्त्रीयाथाय् तकं वनेत तयार दुगु नं धयादिल ।

अथे हे प्रदेशसभा सदस्य रामेश्वर फुयाँलं पीडित सकलें किसानत छप्पँछधी जुयाः न्ह्याः वन धाःसा दुइतिहार सरकारं किसानयात न्याय बी धइगु खँय् थः विश्वस्त दु धयादिल । मेम्ह प्रदेशसभा सदस्य छिरिङदार्जे लामां पीडिततय्सं आः दबावमूलक ज्याझ्वः हयेगु नापं जिम्मेवार निकायय् प्रतिनिधिमण्डलया ध्यानकार्षण यायेगुपाखें वनेमाः धयादिल ।

कागेश्वरी मनोहरा नगरपालिकाया प्रमुख कृष्णहरी थापां लगायत वडाअध्यक्षपिंसं नं सशक्त पलाः न्ह्याकेमाःगु खँय् बः बिउगु दु । वि.सं. २०२१ सालया नापीइ किसानया नामय् दर्ता जूगु कागेश्वरी व गोकर्णेश्वर नगरपालिकास्थित गोठाटार ताँ जःखः स्थानीयवासीया १८८ रोपनी जग्गा २०५३ सालय् लः शुद्धिकरणया निंतिं धकाः बागमतिइ लाकूगु खः ।

करिब २०० स्वयां अप्वः लालपुर्जा दुपिं किसानत पीडित जुयाच्वंगु व वंगु २२ दँ न्ह्यःनिसें किसानतय्सं थीथीकथं विरोधया ज्याझ्वः याना वयाच्वंगु खः ।