शुक्रवाः बसन्तपुली वृहत् बिचाः मुँज्या

येँ – मदुम्ह नेवाः न्ह्यलुवा लिसें बहुआयामिक ब्यक्तित्व भाजु पद्मरत्न तुलाधरया झिंस्वन्हुया पूण्यतिथिस श्रद्धाञ्जलि सभा यायेत न्हूदँ समारोह समितिया नायः सत्यभामा माथेमाया अध्यक्षताय् बिचाः मुँज्या ग्वसाः पुचः नीस्वंगु दु । म्हिगः थनया नेपाः ब्यांक्वेटय् च्वंगु थीथी खलः पुचः व संघसंस्थातय् सहलह मुँज्यां उगु पुचः नीस्वंगु खः ।

मुँज्यां थीथी खलः पुचः व संघसंस्थाया मंकाः ग्वसालय् मदुम्ह तुलाधरया श्रद्धाञ्जलि सभा यायेगु निर्णय याःगु खः । मुँज्यां थ्वहे वइगु कछलाथ्व अष्टमि (कार्तिक ३० गते) तुलाधरया १३ न्हिया पुण्यतिथिसं सुथय् ७.३० बजे येँया बसन्तपुली श्रद्धाञ्जलि सभा यायेगु निर्णय याःगु दु ।

लिसें मुँज्यां आर्थिक उपसमिति निरञ्जनरत्न शाक्य व राजेन्द्रमान शाक्य, मञ्च–माइक व्यवस्थापन उपसमिति ज्योति शाक्य व शैलेश शाक्य बरेजु, चियापान उपसमिति मचाराजा महर्जन, प्रचार प्रसार उपसमिति सुरेश किरण, रविन साय्मि, नृपेन्द्रलाल श्रेष्ठ, राजीव राजोपाध्याय व प्रेरणा शाक्य, थीथी भासं श्रद्धाञ्जलि खँच्व व ब्यानर ब्यबस्थापन उपसमिति दिपक तुलाधरया नेतृत्वय् नीस्वंगु दु । अथे हे निरञ्जनरत्न शाक्य, उमेश स्थापित व सुजिव बज्राचार्य दुथ्याःगु ज्याझ्वः व्यवस्थापन उप समिति नीस्वंगु दु ।