बुद्ध शिक्षा तालिमया सहभागिपाखें बौद्ध सम्पदाया अवलोकन

ख्वप (नेपालभाषा टाइम्स)÷ मैत्रेय युवा संघया ग्वसालय् न्ह्यानाच्वंगु बुद्ध शिक्षाया आधारभूत तालिम क्वचाःगु दु । संघया ग्वसालय् वंगु चैत २५ निसें शनिवाःपतिकं न्ह्यानाच्वंगु तालिम जेठ ६ गते क्वचाःगु खः ।

तालिम समापनलिसें तालिमय् सहभागितय्त वंगु जेठ १३ गते शनिवाः यलया थीथी बहाः, बहीलिसें बौद्ध सम्पदाया अवलोकन याकूगु खः । नापं उगु इलय् अज्याःगु बौद्ध सम्पदाया बारे नं जानकारी बीगु ज्या याःगु खः ।

यलया सुमंगल विहारं शुरु जूगु बौद्ध सम्पदा अवलोकनया झ्वलय् रुद्रवर्ण महाविहार, ऐतिहासिक महाबौद्ध देगः, शाक्यसिंह महाविहार, हिरण्यवर्ण महाविहारया अवलोकन याकूगु खः ।

थुकथं हे येँया आनन्दकुटी विहार, किम्द्वः विहार, शंखम्वलय् च्वंगु अन्तर्राष्ट्रिय बौद्ध भावना केन्द्र, विश्व शान्ति विहारा नं अवलोकन याकूगु खः । बौद्ध सम्पदाया अवलोकनया झ्वलय् सम्बन्धित बहाःबही, विहार, बौद्ध स्थलया बारे भन्ते, गुरुमांलिसें विज्ञ व सम्बन्धित व्यक्तिपिंसं जानकारी बियादीगु खः ।

संघया नायः तीर्थराज वज्राचार्य, तालिमया संयोजक लक्ष्मीचन्द्र वज्राचार्य, संघया विशेष दुजःपिं प्रेमशोभा वज्राचार्य, दानलक्ष्मी वज्राचार्य भक्तपुर बौद्ध महिला संघया नायः सूर्यशोभा वज्राचार्य लगायतयापिनिगु नं सहभागिता दुगु खः ।

उगु इलय् संघपाखें थीथी बहाः बही, विहार, बौद्ध स्थलया अवलोकन यायेगु नापं जानकारी बियादीगुलिं भिक्षु, अनागारिका गुरुमां, सम्बन्धित बहाःयात साधुवाद पौ नं लःल्हाःगु खः ।

अवलोकन भ्रमण संघया सचिव संचित बुद्धाचार्यया संयोजनय् जूगु खः । बुद्ध धर्मया माध्यमं चेतनशील ल्याय्म्हतय् व्यक्तित्व निर्माण यायेगु तातुनाः उकथंया ज्याझ्वः न्ह्याकागु जानकारी संघं बिउगु दु ।

सम्बन्धित बुखँ

LEAVE YOUR COMMENTS