ने. सं. ११४४ कौलाथ्व एकादशी - चालं

नेपाः–भारत सन्धी पुनरावलोक सहमतिपाखे

येँ (नेपालभाषा टाइम्स) – नेपाः व भारत दथुइ जुयाच्वंगु सन् १९५० या सन्धी पुनरावलोक यायेगु बारे निगुलिं पक्ष सहमतिपाखे थ्यंगु खँ धाःगु दु । नेपाः भारतया फुऽं सन्धि सम्झौता पुनरावलोकन यायेत सुझाव बीगु निंतिं दयेकूग प्रवुद्ध व्यक्ति समूह (इजीपी)या खुक्वःगु बैठकय् सहमतिया खँ जूगु खः ।
समूहया बैठक वंगु पुस २७ व २८ गते भारतया न्हू दिल्लीइ खुक्वःगु बैठक च्वंगु खः । उगु बैठकय् नेपाः व भारत दथुया स्वापूयात कयाः दुगु फुक्कं पक्ष टेबलय् तया सहलह जूगु खँ समूहया दुजः डा. राजन भट्टराईनं धयादीगु दु । सहलहय् वःगु गुलिखे खँय् सहमति पाखे थ्यंगु खँ वय्कलं धयादीगु दु । विवादीत विषययात कयाः धाःसा न्हापा न्हापा जूगु थीथी अभ्यासपाखें सहमति मालेगु कुतः जुयाच्वंगु खँ नं वय्कलं धयादीगु दु ।
वय्कःया कथं द्विपक्षीय व्यापार, पारबहन, सामाजिक सांस्कृतिक स्वापू थेंज्याःगु विषयय् सहमति पाखे न्ह्याः वनाच्वंगु दुसा जलस्रोत, सीमा व्यवस्थापन, विवादीत सीमाया बारे, सीमा सुरक्षा, दशगजाया समस्या, वये–वनेगुया सहजता बारे, सन् १९५० या सन्धी व थ्व सन्धीलिसे स्वानाच्वंगु थीथी धारा उपधाराया विषयय् व्यापक सहलह जुयाच्वंगु दु । वय्कलं खुक्वःगु बैठक तक थ्यंबलय् पुनरावलोकनया निंतिं सकारात्मक पाखे न्ह्याःवंगु खँ थःपिंत ताः धयादीगु दु ।
राजदूतपाखे सीमा निरीक्षण
नेपाःया निंतिं भारतीय राजदूत मञ्जिवसिंह पुरीं इलामया पूर्वी पशुपतिनगरय् स्थगलत निरीक्षण यानादीगु दु । थ्व झ्वलय् वय्कलं पशुपति नगरय् अध्यागमन कार्यालय तयेगु निंतिं थःम्हं पहल यायेगु खँ धयादीगु दु । वय्कलं स्थानीयतय्सं वर्षौं न्ह्यवनिसें माग यानाच्वंकथं अध्यागमन ज्याकू तयेगु निंतिं थम्हं केन्द्रीय तह तक हे पहल यायेगु बचं बियादीगु खः ।