ऐतिहासिक फल्चाया शिलान्यास

ख्वप(नेपालभाषा टाइम्स)- थनया वडा नं. ८ साःक्वलान त्वालय् च्वंगु ऐतिहासिक पालिफः फल्चा पुनःनिर्माणया निंतिं शिलान्यास याःगु दु । ख्वप नगरपालिकाया प्रमुख सुनिल प्रजापतिं छगू ज्याझ्वःया दथुइ उगु ऐतिहासिक फल्चाया शिलान्यास यानादीगु खः ।

नगर प्रमुख प्रजापतिं विश्वया निंतिं मंकाः सम्पत्ति खःसा स्थानीय जनताया तिसा खः धासें सम्पदाया महत्वयात थुइके मफुगुलिं हे ऐतिहासिक, पुरतात्विक धार्मिक महत्वया मूर्तियात सामान्य ल्वहं तायेकाः म्हितेगु व न्ह्यइपुकेगु वयाच्वंगु दु धयादिल । सम्पदाया महत्व थुइ धुंकाः जक उकिया संरक्षण यायेगु ज्याय् लगे जुइगु यानाच्वंगु यक्वसिया अनुभव दुगु नं वय्कलं कनादिल ।

ख्वप देशय् सम्पदा पुनःनिर्माण व मेमेमेगु विकास निर्माणया ज्या स्थानीय जनताया सहभागिताय् उपभोक्ता समिति गठन यानाः यायेगु जूगुलिं न्हापा थें हे बल्लाःगु, मौलिक संरचनाय् निर्माण जूगु व अपनत्व नं महसुस याये फयाच्वंगु दु धयादिल ।

९ वडाअध्यक्ष रविन्द्र ज्याख्वं फल्चा पुनःनिर्माणया निंतिं स्थानीयलिसे तःक्वः सहलह यानाकथं मौलिक शैलीइ सुर्की चुना प्रयोग यानाः पुनःनिर्माण याये त्यनागु जानकारी बियादिल ।

उपभोक्ता समितिया अध्यक्ष विष्णुबहादुर मानन्धरं पालिफः फल्चालिसे स्वानाच्वंगु ऐतिहासिक पक्षयात कयाः जानकारी बियादीगु ज्याझ्वलय् ख्वप नगरपालिकाया निमित्त प्रमुख प्रशासकीय अधिकृतलिसें सम्पदा शाखा प्रमुख रामगोविन्द श्रेष्ठ, पुलांम्ह वडाअध्यक्षलिसें नेमकिपा ९ वडा समितिया उपाध्यक्ष ज्ञानसागर प्रजापति, उपभोक्ता समितिया सचिव अष्टलाल मानन्धर व तुलसीकाजी मानन्धरं नं नुगःखँ तयादीगु खः ।