बनेपाय् ठक्कर नकाः मनू स्याःगु टिपर च्याकाबिल

येँ – बनेपाय् टिपरं ठक्कर नकाः छम्ह मनू सीवं तंम्वःपिं स्थानीय जनतां टिपर च्याकाबिउगु दुसा लिक्कसं च्वंगु छगू प्रहरी बिट नं तछ्यानाबिउगु दु । थौं न्हिनय् बनेपां धुलिखेल पाखे वनाच्वंगु टिपरं बनेपाया दुवातय् मोटरसाइकलयात ठक्कर नकेवं मोटरसाइकल गयावःम्ह सीगु खः । टिप्परं ठक्कर नकाः नमूरा खनालथोकया जीतबहादुर तामाङ सीगु खः ।

स्थानीय जनतां च्याकाबिउगु बा २ क ३९३४ नम्बर टिपर धाःसा पूवंक क्षति जूगु खँ धाःगु दु । टिपरं च्याकाबिइवं बनेपा नगरपालिकाया ट्यांकर हयाः मी स्यायेत स्वःगु खःसां टिपर बांमलाक च्यायेधुंकूगुलिं पूवंक क्षति जूगु खँ धाःगु दु । प्रहरी टिपर चले यानावःम्ह नुवाकोटया २९ दँ दुम्ह सुधन श्रेष्ठयात ज्वनेधुंकूगु दु ।