मिं नइगु घटना अप्वल !

वंगु छुं दिं न्ह्यःया नीप्यघौया छगू विवरण स्वयेगु खःसा देय्न्यंकंया वनजंगलमध्ये १,६७० थासय् मिं नःगु खनेदु । अमेरिकी वैज्ञानिक संस्था नासाया ‘मोडिस् स्याटेलाइटं’ छ्वयाहःगु तस्वीरय् नेपाःया स्वीन्यागू जिल्लाय् मिं नःगु घटना जूगु खनेदगु खः । उकीमध्ये दकलय् अप्वः कैलालीइ ४१७ थाय् वनजंगलय् मिं नःगु खने दु ।

नासाय उगु तस्वीरया आधारय् स्वयेु खःसा कञ्चनपुरय् १९१? डडेल्धुराय् १८८, दाङय् १७५, सुर्खेतय् १४६, बर्दियाय् १३३, सल्यानय् १००, डोटीइ ६७, बाँकेय् ५५, अर्घाखाँचीइ ५०, अछामय् ४१, प्यूठानय् २३, बैतडी व दैलेखय् १४÷१४, गुल्मीइ ९, धादिङय् व सिन्धुपाल्चोकय् ७÷७ गू थाय् मिं नःगु घटना जूगु खनेदु ।

थ्व बाहेकं मेमेगु जिल्लाय् नं छगू निगू थासय् मिं नःगु घटना खनेदु । वन तथा वातावरण मन्त्रालयया उपसचिव लिसें डढेलो विज्ञ सुन्दर शर्मायाकथं नेपालय् बैशाखया निगूगु वाः दकलय् अप्वः मिं नइगु ई खः । लिसें ८० प्रतिशत स्वयां अप्वः मिं नइगु घटनामध्ये फागुननिसें मध्य बैशाख तकया दुने जुइगु याः ।

थुगु दँय् दकलय् अप्वः थ्व स्वयां न्ह्यः बैशाख १६ गते १,८७१ थासय् मिं नःगु खः । विगतया दँया तुलनाय् मिं नइगु घटना अप्वया वनाच्वंगु खने दुसा थुगु दँय् धाःसा उलि तःधंगु क्षति जुइकथं घटना जूगु खबर प्राप्त मजूगु वय्कलं धयादिल । मिं नइगु घटनाया सम्बन्धय् मन्त्रालयं सम्बन्धित वन डिभिजन ज्याकूयात खबर यायेगु नापनापं सतर्कता नालेत निर्देशन नं बी धुंकूगु दु ।

यद्यपि मिं नइगु घटनाया प्रतिकार्यया निंतिं स्वंगुलिं तहया सरकारलिसे पर्याप्य उपकरण व जनशक्ति मदुगु मन्त्रालयया स्वीकारोक्ति दु ।
जलवायु परिवर्तनया कारणं तापमानय् वृद्धि जूगुलिं यानाः विश्वय् मिं नइगु घटना अप्वया वनाच्वंगु डढेलो विज्ञ शर्माया धापू दु । नेपालय् मिं नइगु घटना नियन्त्रण सरकारया उच्च प्राथमिकताय् नं लाये मफयाच्वंगु सरोकारवालातय् धापू दु ।

यद्यपि मन्त्रालयं वन जंगलय् मिं नयाः जुइगु क्षति पनेत न्हापांखुसी थुगुसी सतर्कता प्रणाली (अलर्ट सिष्टम) सहितया ‘अग्नि नियन्त्रण कक्ष’ स्थापना याःसां नं उकियात अझं पूर्ण संचालनय् धाःसा हये फयाच्वंगु मदुनि । अन्तर्राष्ट्रिय एकीकृत पर्वतीय विकास केन्द्र (इसिमोड)या प्राविधिक ग्वाहालिइ वन तथा भू–संरक्षण विभागय् स्थापना यायेत्यंगु उगु कक्ष संचालनय् हयेगु तयारी जुयाच्वंगु उगु कक्षया सम्पर्क व्यक्ति तकं जुयाच्वनादीम्ह शर्मां जानकारी बियादिल ।

नासाया स्याटेलाइटं ‘गुगलअर्थ’य् निरन्तर छ्वया हइगु मिं नःगु घटना सम्बन्धी तस्वीर ९५ प्रतिशत स्वयां अप्वः विश्वसनीय जू । नासाया स्याटेलाइटं जमीनय् म्होतिं नं १०० मिटर ग्रिडतकया मिं नःगु घटनाया बारे जक संकेत बीगु याः । चिचिधंगु मिं नःगु घटना व छेँ वा छेँय् पल्लिइ मिं नःगु घटना धाःसा खंके मफयेफु ।

 

 

सम्बन्धित बुखँ

LEAVE YOUR COMMENTS