नक्कली शरणार्थी काण्डया फाइल सरकारी वकिलयात
येँ (नेपालभाषा टाइम्स)- नक्कली भुटानी शरणार्थी प्रकरण सम्बन्धी अनुसन्धान प्रतिवेदन प्रहरीं सरकारी वकिलया ज्याकुथिइ लःल्हाःगु दु । जिल्ला प्रहरी परिसर येँनं निला बिकाः याःगु अनुसन्धान लिपा म्हिगः प्रतिवेदन लःल्हाःगु खः ।
नेपाःमितय्त भुटानी शरणार्थी दयेकाः अमेरिका छ्वया बी धकाः करोडौं तका म्हःगु द्वपनय् ३३ म्ह मनू दुथ्याःगु निष्कर्ष पिकासें रायसहितया अनुसन्धान प्रतिवेदन जिल्ला सरकार वकिलया ज्याकुथिइ लःल्हाःगु खः ।
प्रहरीं तयार याःगु प्रतिवेदनय् गुलिसितं ठगी व संगठित अपराध, गुम्हेसितं लिखत सम्बन्धी कसुरय् मुद्दा न्ह्याकेत प्रहरीं सिफारिस याःगु खः । गुलिसितं धाःसा अख्तियार दुरुपयोग अनुसन्धान आयोग व सम्पत्ति शुद्धीकरण अनुसन्धान विभागं मुद्दा न्ह्याकेत नं सिफारिस याःगु खँ प्रहरीं धाःगु दु । थुगु प्रकरणय् दुथ्याःपिं ३३ म्ह मध्ये १६ म्हेसित जिल्ला प्रहरी परिसर येँया थीथी प्रहरी ज्याकुथिइ कुना तःगु दु । १७ म्ह फरार जुयाच्वंगु दु ।
थ्वहे झ्वलय् येँया प्रहरी परिसर प्रमुख एसएसपी दानबहादुर कार्कीं आः तक अनुसन्धान प्रमाण लूपिनिगु प्रतिवेदन लःल्हानागु खःसां थप मनूया बारे अनुसन्धान न्ह्यानाच्वनीगु खँ धयादीगु दु ।
म्हिगः पत्रकारततलिसे खँ ल्हासें एसएसपी कार्कीं धयादिल, ‘अनुसन्धानया झ्वलय् वष्तुनिष्ठ कारण व तथ्य लुल धाःसा हाकनं मुद्दा न्ह्यःने वनी । जिमिसं अनुसन्धानया ज्या अझ नं न्ह्याकाच्वनागु दु, आः कसुरदार खनेदुपिनिगु हकय् प्रतिवेदन छ्वयागु खः । थ्व प्रकरणय् थुपिं बाहेक मेपिं मनूत नं दुथ्याःगु जुइफु ।’ वय्कःया कथं थुगु प्रकरणय् उजुरीकर्ताया दाबीया आधारय् २७ करोड बिगो माग याये फइगु राय बिउगु दु ।
थ्वहे झ्वलय् थ्व प्रकरणय् दुथ्याःपिंत कन्हय् तकया दुने अदालतय् मुद्दा दायर यायेगु जानकारी जिल्ला सरकारी वकिलया ज्याकूया सहन्यायाधिवक्ता अच्युतमणि नेउपानें बियादीगु दु । आः प्रहरीं अनुसन्धान क्वचायेकाः बिउगु प्रतिवेदनया विश्लेषण व प्रमाणया आधारय् सरकारी वकिलया ज्याकुथिं मुद्दा न्ह्याकीगु खँ धाःगु दु । नेउपानेया कथं ज्वंपिंत ठगि, संगठित अपराध व राज्य विरुद्धया अपराधया मुद्दा लाइगु सम्भावना दु ।
LEAVE YOUR COMMENTS