लानिपुखू पुनर्निर्माण यायेत समिति स्वन

येँ – लानिपुखू लिसें अन च्वंगु पुरातात्विक संरचना पुनर्निर्माण यायेत लानिपुखू पुनर्निर्माण अनुगमन तथा समन्वय समिति स्वंगु दु ।
राष्ट्रिय पुनर्निर्माण प्राधिकरणया कार्यकारी दुजः डा. चन्द्रबहादुर श्रेष्ठया संयोजकत्वय् स्वंगु समितिइ पुरातत्व विभागया महानिर्देशक व येँ महानगरपालिकां क्वःछिउपिं स्वम्ह जनप्रतिनिधि दुजः कथं दइगु खँ धाःगु दु ।

अथेहे प्राधिकरणं क्वःछिउपिं सम्बन्धित विषयया स्वम्ह विज्ञ प्रा.डा. प्रेमनाथ मास्के, पुरातत्व विभागया पुलांम्ह महानिर्देशक बिष्णुराज कार्की व काठमाडौं उपत्यका संरक्षण कोषया कार्यकारी निर्देशक रोहित रञ्जितकार दुजः कथं च्वंगु दु । अथे हे प्राधिकरणया सम्पदा संरक्षण, सार्वजनिक भवन तथा पूर्वाधार महाशाखा प्रमुख समितिया सदस्य सचिव कथं च्वनीगु खँ धाःगु दु ।

समितिं लानिपुखू व बालगोपालेश्वर देगः लगायत उगु क्षेत्रय् दुगु पुरातात्विक संरचनाया पुनर्निर्माण व्यवस्थित व पारदर्शी ढंगं दयेकेत अनुगमन, सहजीकरण व समन्वय याइ । समितियात पुनर्निर्माणया निंतिं सुझाव बीगु, गुणस्तर स्वयेगु, माःगु ग्वाहालि यायेगु व ज्या यायेगु झ्वलय् खने दइगु समस्याया समाधान यायेगु जिम्मेवारी बिउगु दु ।

समितियात आवश्यकता कथं उपसमिति नीस्वनेगु अधिकार नं बिउगु दु । समितिं पुनर्निर्माणया निंतिं माःगु आर्थिक स्रोत व नीतिगत व्यवस्थाया निंतिं प्राधिकरणयात इनाप यायेफइ । समितिया न्हापांगु बैठक म्हीग बुधवाः च्वंगु दु । बैठकय् प्राधिकरणया प्रमुख कार्यकारी अधिकृत सुशील ज्ञवाली विशेष आमन्त्रित दुजः कथं ब्वति झाःगु खः ।

समितिं लानिपुखूया क्वय्या ब्व लिसें पःखाः दयेकेबलय् हाकुचा, फि व अप्पा थेंज्याःगु परम्परागत ज्वलं छ्यलेगु, उपभोक्ता समिति नीस्वनाः सिफारिस यायेत येँ मनपायात पत्राचार यायेगु निर्णय याःगु दु । लानिपुखूया दथुइ च्वंगु बालगोपालेश्वर देगःया पुनर्निर्माण व सौन्दर्यीकरण व्यवसायीपाखें यायेगु निर्णय जूगु दु । मन्त्रिपरिषदया वंगु माघ १४ गते च्वंगु बैठकं लानिपुखू व बालगोपालेश्वर देगः पुनर्निर्माण यायेगु जिम्मा प्राधिकरणयात बिउगु खः ।

 

सम्बन्धित बुखँ

LEAVE YOUR COMMENTS