चाँगुइ नं अवैध छेँ टहरा थुनेगु शुरु

येँ – चाँगुनारायण नगरपालिकां नगरकोट सतकया जःखः सामुदायिक वन क्षेत्र अतिक्रमण यानाः दयेकातःगु छेँ टहरा म्हिगः जोडर हयाः थुनाबिउगु दु । डोजर हयाः अतिक्रमण यानाः दयेकातःगु स्वसःखा छेँ÷टहरा थुनेत वंगु डोजरयात अतिक्रमण यानाः च्वनाच्वंपिंसं पनेत स्वःगु खः । वयां लिपा प्रहरी परिचालन याःगु खःसा थुकिं यानाः अतिक्रमकारी व प्रहरी दथुइ झडप जूगु खः ।

नगरपालिका, वन कार्यालय, जिल्ला प्रशासन व प्रहरीया निर्णयपाखें अतिक्रमण यानाः दयेकातःगु छेँ टहरा थुनेगु झ्वलय् पंगः थनाः अप्पां कयेकेवं प्रहरी हस्तक्षेप याःगु खँ महानगरीय प्रहरी परिसर ख्वपं धाःगु दु । प्रहरीं लाठी चार्ज यायेवं पंगः थनेत वयाच्वंगु भीड छ्यालब्याल जूगु खः । वयां लिपा स्थानीय सतकया दथुइ टायर च्याकाः लँय् पंगु खः ।

वन क्षेत्रय् अवैध रुपं टहरा दयेकाः च्वनाच्वंगु नीगू व्यवसायिक टहरा लछि न्ह्यः नगरपालिकां थुना बिउगु खः । वयां लिपा नगरपालिकां तःक्वः हे सुचं जारी याःसां नं टहरा थुनेत अटेर याःगुलिं म्हिगः नगरपालिकां डोजर हयाः टहरा थुना बिउगु खः । नगरपालिकाया प्रमुख सोमप्रसाद मिश्रं थनया टहरा थुनेत झिदँ न्ह्यः हे निर्णय जूसां नं कार्यान्वयन मजुयाच्वंगु व आः उकियात कार्यान्वयन यानागु खँ कनादीगु दु ।

नगरपालिका क्षेत्रया सामुदायिक वन व सतक तकं अतिक्रमण यानाः दयेकातःगु टहराय् रेष्टुरेन्ट व नसा नयेगु पसः लिसें थीथी व्यवसाय सञ्चालन याना वयाच्वंगुलिं नगरपालिकां थम्हं थुनेत पटक पटक सुचं जारी यानाः नं मथुंसें अटेर याना वयाच्वंगुलिं डोजर हयाः थुनेमाःगु खँ प्रमुख मिश्र कनादीगु दु ।

व्यवसायी वन क्षेत्र अतिक्रमण याःगु धासें टहरा दयेकूगु, व्यवसाय दर्ता मयाःगु व कर तकं छले याना वयाच्वंगु धासें स्थानीय वासिन्दां अवैध टहरा थुनेमाःगु माग याना वयाच्वंगु खः ।

सम्बन्धित बुखँ

LEAVE YOUR COMMENTS