ने. सं. ११४३ तछलाथ्व द्वादशी -

तःमुँज्याया सांस्कृतिक विधाया लिच्वः पिदन

ख्वप – स्वीच्याक्वःगु नेपालभाषा साहित्य तःमुँज्याया सांस्कृतिक विधाया लिच्वः पिदंगु दु । लिच्वःकथं ख्वप बहुप्राविधिक अध्ययन संस्थान नर्सिङ कलेजं न्ह्यब्वःगु ‘जिता नं ब्वङ यंकाया’ नांगु छधाःप्याखं न्हाप लाःगु दु ।

विकल प्रजापतिं च्वयादीगु व निर्देशन नं यानादीगु उगु प्याखं नेवाःतय्त विस्थापित यायेगु षडयन्त्र स्वरुप ख्वपय् अन्तर्राष्ट्रियस्तरया रंगशाला दयेकाः किसानतय्त खेती योग्य जग्गापाखें विस्थापित यायेत स्वःगु विरुद्ध केन्द्रीत यानाः च्वयातःगु खः ।

प्याखंया च्वमि प्रजापति उत्कृष्ट च्वमि घोषित जूगु दुसा उगु हे प्याखनय् मिजं जुयाः म्हितादीम्ह मय्जु तिना बैद्य उत्कृष्ट मिसा प्याखंम्वः घोषित जूगु दु ।अथेहे ‘विध्वंस’ नांगु ख्वप कलेजया छधाः प्याखं लिउ लाःगु दु । उगु हे प्याखंया निर्देशकद्वय राजेन्द्र श्रेष्ठ व श्यामसुन्दर शिल्पकार उत्कृष्ट निर्देशक घोषित जूगु दु ।

छधाःप्याखंपाखे चोर्चा परिवारया न्ह्यब्वया ‘पूर्वमन्त्रीया चर्तिकलां’ लियालिउं लाकेत ताःलाःगु दु । ख्यालःपाखे नाट्यकर्मि समाजया ‘यमलोक’ न्हाप, स्कलर्स होम एकेडेमीया ‘यमलोकय् पार्टी’ लिउ लाःगु दुसा यमलोकय् पार्टीया प्रित शिल्पकार बांलाःम्ह मिजं प्याखंम्व व यमलोक ख्यालःया विकास तमखुं उत्कृष्ट दबू छायेपाःया सिरपाः त्याकूगु दु ।

हुलाप्याखंपाखे बांलाःम्ह म्येँच्वमि प्रेम प्रजापतिं व बांलाःम्ह हुलाप्याखं कलाकारया सिरपाः स्रयस्का शिल्पकारं त्याकूगुु दु । अथेहे बांलाःम्ह प्याखं स्यनामि बालमुकुन्द प्रजापति जुयादीगु दुसा बांलाम्ह लय्चिनामिया सिरपाः पुरुषोत्तम सुवाल व बांलाःगु दबू छायेपाःया सिरपा विकास तमखुं त्याकेत ताःलाःगु दु ।

धिमय् प्याखनय् ख्वप्रिङ इंग्लिस स्कुल न्हाप, नेक्रासां संघ १० लिउ व निओ फ््युजन स्कुल अफ कम्प्यूटर लियालिउ लाःगु दु । हुला प्याखंया म्येँ बिधाय् आस्था सांस्कृतिक परिवार न्हाप, बाल विकास ईंग्लिस स्कुल लिउ व नित्यनाथ पासा पुचः लियांलिउ लाःगु दु ।
थुगुसीया तःमुँज्या वंगु कौलाथ्व त्रयोदशि व चतुर्दशि निन्हुयंकं जूगु खः ।