थौं बुद्ध जयन्तीया देय्न्यंकं थीथी ज्याझ्वः

येँ (नेपालभाषा टाइम्स)- थौं २५६७ क्वःगु बुद्ध जयन्ती थीथी ज्याझ्वः यासें देय्न्यंकं हनाच्वंगु दु । थ्व लसताय् थौं बुद्ध जयन्ती समारोह समितिया ग्वसालय् येँया आनन्दकुटी विहारय् विशेष ज्याझ्वः जुइत्यंगु दु । ज्याझ्वलय् उपराष्ट्रपति रामसहायप्रसाद यादव मूपाहां कथं झायादी ।

लिसें थौं हे बुद्धया अस्थिधातु नं तिंख्यलंनिसें शोभा यात्रा यानाः हइगु ज्याझ्वः दु । अथे हे थौं लुम्बिनीइ प्रधानमन्त्री पुष्पकमल दाहालयात मूपाहां दयेकाः विशेष ज्याझ्वः याइगु ग्वसाः दु ।

थ्व लसताय् लुम्बिनीइ मत च्याकेगु व सभाया ज्याझ्वः नं जुइ । बुद्ध जयन्तीया लसताय् थौं देय्न्यंकं चैत्य दुथाय् व विहारय् बुद्ध पुजा, बाखं कने व दान प्रदानया ज्याझ्वः जुयाच्वंगु दु ।