वा वयाः लानिपुखुली लः मुन

येँ – २०७२ सालया तःभुखाचं ध्वस्त जूगु लानिपुखुली वंगु विहीवाः निसें निरन्तर वा वयाच्वंगुलिं लः मुनाच्वंगु दु । तर अन लः मुनाच्वंसां नं उगु लः ज्वया वं कि मवं धकाः स्वयेगु निंतिं निन्हु स्वन्हु निभाः त्वल धाःसा जक सीदइगु खँ रानीपोखरी पुनर्निर्माण उपभोक्ता समितिया सचिव रोशन तुलाधरं ‘नेपालभाषा टाइम्स’ यात कनादीगु दु ।

म्हीगंनिसें पुखुली लः मुनाच्वंगु खःसा म्हिगः भचा अप्वः लः मुंगु जानकारी बियादिसें लः मुंगु बारे अध्ययन यायेमानिगु खँ नं वय्कलं कनादीगु दु । आः लः मुनाच्वंगु थासय् न्हापा नं चा प्यानाच्वंगु व पुखू पूर्ण रुप सुख्खा जूगु मखु धासें आः दुगु लः तनावनी कि मवनी धकाः अध्ययन जुइगु खँ कनादीगु दु ।

वा वयाः लः मुंगु ला पाय्छि जुइ तर अन लः बुया वइ वा मवइ धइगु खँ वा वःगु इलय् सीकेफइगु खँ कनादिसें लः रिचार्ज जुल धाःसा बांलाइगु बिचाः नं वय्कलं तयादिल । वय्कःया कथं आः लः मुनाच्वंगु थासय् नं हाकुचा इलेगु ज्या जुइगु खँ कनादिसें मू रुपं रिचार्ज जुइगु थाय् मालेमाःगु खँ कनादिल ।

थ्व स्वयां न्ह्यः लानिपुखुली निगू चीधंगु पुखू दयेकाः लः ज्वः कि मज्वः स्वयेगु ज्या जुयाच्वंगु दु । निगुलिं पुखुली लः धाःसा ज्वया वंगु मदु । लानिपुखू पुनर्निर्माणया झ्वलय् अन पःखाः दयेकेगु ज्या जुयाच्वंगु दु ।

सम्बन्धित बुखँ

LEAVE YOUR COMMENTS