नेपालपाखें न्हूगु पार्टीया घोषणा
येँ – नेकपा एमालेया वरिष्ठ नेता माधव नेपालं न्हूगु पार्टी चायेकेगु घोषणा यानादीगु दु । मंगलवाः थःगु पक्षया जनवर्गीय संगठनया दुजःतय् भर्चुयल भेलायात सम्बोधन यासें वय्कलं आः थःपिं न्हूगु पार्टी चायेकाः न्ह्याः वनेगु घोषणा यानादीगु खः । वय्कलं एमालें थः सहित झिंप्यम्ह सांसदयात पार्टीं चीकेगु निर्णय याःसां उकिं छुं मपाकीगु दावी नं यानादिल ।
नेता नेपालं पार्टी एकताया निंतिं कुतः जुयाच्वंगु इलय् थः सहित सांसदिपिंत कारबाही यानाः एकताया लुखा तिना बिउगु द्वपं नं बियादिल । म्हिगः पार्टी नेता घनश्याम भुसाल एकताया नितिं निगू बुँदाया सहमति कयाः ओलीलिसे वार्ता याःवंगु इलय् कारबाही याःगुलिं आः न्हूगु पार्टी दयेकेगु बाहेक मेगु विकल्प मदुगु खँ वय्कलं धयादिल ।
नेता नेपालं धयादिल, ‘कमरेड घनश्याम भुसाल एकताया निंतिं लिपांगु कुतः याये धकाः वल, जिं वय्कःयात ओलीं थ्व स्वयां न्ह्यः याःगु फुक्कं निर्णय लित कायेगु व न्हापा बिउगु बचं पूवंकेगु जूसा एकताया कुतः यानादिसं धया, उकियात स्वीकार याये धाल, तर लिसः मवयेवं कारबाही यात ।’
वय्कलं सासंद पदं निष्काशन याःसा थःपिं विचलित जुइ मखु धासें न्हूगु पार्टी चायेकूसां ओलीं गल्ती स्वीकार यात धाःसा हानं पार्टी एकता याये फइगु खँ नं कनादिल । वय्कलं धयादिल, ‘एकताया निंतिं न्ह्याबलें लुखा चाली, चुनावय् तालमेल नं याये फइ, तर उकिया नितिं ओली सुध्रे जुइमाः ।’
माधवया १४ सांसद कारवाही
एमालें म्हिगः वरिष्ठ नेता माधव नेपाल सहित १४ म्ह सांसदयात कारबाही याःगु दु । सरकारं संसदीय दलय् २० प्रतिशत दयेकाः दल विभाजन याये फइगु अध्यादेश हयेवं ओली पक्षं नेपाल पक्षयात कारबाही याःगु खः ।
ओली पक्षं माधव नेपाल, मुकुन्द न्यौपाने, जीवनराम श्रेष्ठ, रामकुमारी झाक्री, विरोध खतिवडा, कल्याणी खड्का, लक्ष्मीकुमारी चौधरी, निरादेवी जैरु, पुष्पाकुमारी कर्ण, सरलाकुमारी यादव, कमला खातुन, कृष्णलाल महर्जन, भवानी खापुङ व मेटमणी चौधरीयात कारवाही याःगु खः । पार्टीं छ्वःगु पौया बारे सभामुखं निर्णय यायेवं जक कार्यान्वयन जुइगुु कानुनी प्रावधान दु ।
ओली पक्षं याःगु कारबाही बारे ‘नेपालभाषा टाइम्स’ लिसे खँ ल्हासें नेपाल पक्षया सांसद जीवनराम श्रेष्ठं थ्व कारबाही धइगु केपी ओलीया कायरता खः, ओलीं पार्टी एकता चाहे मजू धइगु खँसा ज्वलन्त दसु खः धयादिल ।
एमालेपाखें म्हिगः हे निर्वाचन आयोगय् वनाः थःपिनि २६० म्ह केन्द्रीय दुजःतय् धलः नं लःल्हाःगु दु । थ्व स्वयां न्ह्यः एमालेयाके २०३ म्ह जक केन्द्रीय दुजः दुगु खः । एमालेया थ्व धलःयात मान्यता बिल धाःसा माधव पुचःयात २० प्रतिशत केन्द्रीय दुजः खाकेत अझ थाकुइ ।
LEAVE YOUR COMMENTS