केपी ओलीया गाडीइ हानं आक्रमण

येँ (नेपालभाषा टाइम्स)÷ प्रदेश १ या थीथी जिल्लाय् कार्यकर्ता भेलायात सम्बोधन याःवनाच्वंम्ह नेकपा (एमाले) या अध्यक्ष केपी ओलीयात शनिवाः हानं पहिचानवादीतय्सं आक्रमण याःगु दु । कार्यकर्ता भेलायात सम्बोधन यानाः लिहां वयाच्वंम्ह अध्यक्ष ओलीयात पान्थरया फेदेन धाःगु थासय् आक्रमण याःगु खःसा उकिं बचे जुइत वय्कःया गाडी बिसिउँ वने माःगु खः ।

कार्यक्रम सिधयेकाः ओली लिहां वयेत्यंगु इलय् कोशी नामाकरण विरुद्ध आन्दोलन यानाच्वंपिं पहिचानवादीतय्सं फेदेन धाःगु लँदुवातय् च्वनाः पियाच्वंगु खः । ओली लिहां वयेवं वय्कःयात हाकुगु ध्वाँय् क्यनाः विरोध प्रदर्शन यायेगु उगु पुचःया ग्वसाः खः । ओलीया गाडी अन थ्यनेवं उमिसं हाःहू यानाः ओली विरुद्ध नाराबाजी यायेवं ओली च्वनावःगु गाडी बेतोडं ब्वाकूगु खः । वयां लिपा आन्दोलनकारीतय्सं गाडीयात छुं दूरी तक लिना नं यंकूगु खः ।

आन्दोलनकारीतय्सं ओलीया गाडीयात लिनायंकूगु इलय् अन सशस्त्र प्रहरीया सुरक्षाकर्मीत नं पाः च्वनाच्वंगु खः । तर आन्दोलनकारीतय्त उमिसं नं पने धाःसा मफुत ।
प्रदर्शनकारीतय्सं छपाः ल्हातय् हाकुगु ध्वाँये व मेगु ल्हातय् अप्पा ज्वनाः ओलीया गाडीयात लिना छ्वःगु खः ।

पहिचानवादी आन्दोलनकारीतय्सं थ्व स्वयां न्ह्यः नं झापाया बुद्धशान्ति गाउँपालिकाय् ओलीया गाडीयात अप्पां कयेकाः आक्रमण याःगु खः । उगु इलय् नं ओलीया गाडी ब्वाकाः बिसिउँ वनेमाःगु खः ।

एमाले अध्यक्ष ओलीं प्रदेश १ यात ‘कोशीप्रदेश’ धकाः नां तःगु पाय्छि खः धासें आः हिम्मत दुसा दुई तिहाइ बहुमत हयाः नां हिला छ्व धकाः हाथ्या बियादीगु दु । कोशी प्रदेशया पक्षय् एमाले अध्यक्ष ओलीं न्ववानाच्वंगु धापू न्यनाः पहिचानवादी शक्तित आक्रोशित जुयाच्वंगु दु । उमिसं पहिचान विरोधीतय्त प्रदेशय् हे दुकाये मखु धकाः घोषणा यानातःगु दु । पहिचानवादी पक्षधरतय् लगातारया विरोधं यानाः सरकारं आः तक प्रदेश सभाया बैठक तकं सःते फयाच्वंगु मदुनि ।

 

सम्बन्धित बुखँ

LEAVE YOUR COMMENTS