‘कानून दयेकेगु, डाङडुङ यायेगु’

सछिन्हु लिपा ३ नम्बरय् खने दयेक ज्या जुइ

येँ – प्रदेश नम्बर ३ या भौतिक पूर्वाधार मन्त्री केशव स्थापितं आः वइगु सछिन्हु लिपा प्रदेश दुने खने दयेक ज्या जुइगु खँ कनादीगु दु । म्हीग प्रदेशय् मन्त्री पदया शपथ ग्रहण लिपा ‘नेपालभाषा टाइम्स’ लिसे खँ ल्हासें वय्कलं धयादिल, ‘आः वइगु स्वला ला प्रदेशयात माःगु कानून जक दयेकु दयेकुं हे फुइ । वयां लिपा ज्या शुरु जुइ ।’

कानून दयेकेवं हे नवनिर्माणया लागिं डाङडुङ यानाः पुलांगु फुक्क थुना छ्वयेगु खँ वय्कलं कनादिल । वय्कलं धयादिल, ‘न्हूगु दयेकेगु खःसा पुलांगु थुना छ्वये हे माः ।’
थौंकन्हय् दिनाच्वंगु सतक विस्तारया ज्यायात न्ह्यःने यंकेगु खँ नं वय्कलं कनादिल । तर उकिया लागिं जनतायात जबर्जस्ती धाःसा मयायेगु दावी नं वय्कलं धयादिल । थःपिंसं यायेगु ज्या खनाः जनता थःपिंसं हे जिगु छेँ थुना बिउ धकाः धाः वइगु दावी वय्कलं यानादिल ।

प्रदेश राजधानी हेटौंडाय् एशियन हाइवे दयेकेगु लागिं सतक विस्तार यायेगु धकाः तयारी जूबलय् स्थानीय जनतां विरोध याःगु खः । लिपा शेरबहादुर देउवाया सरकारं चुनाव न्ह्यः उगु हाइवे बजार लागां मछ्वयेगु धकाः निर्णय याःगु खः ।

तर आः न्हू वःम्ह भौतिक पूर्वाधार मन्त्री स्थापितं थ्व हाइवे बजार लागां हे छ्वयेगु जुइ धयादीगु दु । वय्कलं हेटौंडाया जनतायात थुकिया जानकारी समेत बिया थकूगु दु । यदि थ्व हाइवे बजार लागां मछ्वत धाःसा बजाः सुके जुयाः जनतायात झन् तःधंगु समस्या वइ धासें थ्व लँ दयेकां त्वःतेगु जुइ धयादीगु दु । थ्व ज्याया लागिं आः थम्हं येँय् वयाः टीम तयार यायेगु व ज्याया योजना नं दयेकाः हेटौंडा वनेगु खँ नं वय्कलं कनादिल ।

आः प्रदेशय् ज्या न्ह्याकेगु लागिं आपालं कानूनत दयेके मानिगु खःसां थ्व खास थाकु धाःसा मजुइगु दावी नं वय्कलं यानादिल । ‘न्हापा केन्द्रया लागिं दयेकातःगु कानूनयात हे निगू प्यंगू शब्द हीकाः पारित यायेगु ला खः नि’ वय्कलं धयादिल ।