येँ महानगर दुने ३७१५ म्ह सक्रिय संक्रमित

येँ – येँ महानगरपालिका दुने जक संक्रिय संक्रमिततय् ल्याः ३७१५ म्ह थ्यंगु दु । येँ मनपाया शहरी स्वास्थ्य विभागं जारी याःगु तथ्यांक कथं वंगु बैशाख २२ गते तक सक्रिय संक्रमितया ल्याः उलि थ्यंगु खः । येँ मनपाया सुइनिगुलिं वडाय् सक्रिय संक्रमित दुगु खँ तथ्यांकं क्यनाच्वंगु दु ।

सुइनिगू वडा मध्ये दकलय् अप्वः सक्रिय संक्रमित ३२ वडाय् दु । उगु वडाय् ३९८ म्ह सक्रिय संक्रमित दु । उकथं हे वडा ९य् ३०५, वडा १६य् ३०० म्ह सक्रिय संक्रमित दुसा दकलय् म्हो २३ वडाय् गुम्ह सक्रिय संक्रमित दु ।

तथ्यांक कथं आः तक येँ मनपाय् ४०२९७ म्ह संक्रमित खनेदुगु दुसा उकी मध्ये २८० म्ह सीगु दु । ३६३०२ म्ह संक्रमण मुक्त जुइधुंकूगु दु । येँ मनपा दुनेया अस्पतालय् १९४ म्ह वासः याकाच्वंगु दुसा ८४ म्ह संस्थागत आइसोलेसनय् दुसा ३४३७ म्ह होम आइसोलेसनय् च्वनाच्वंगु दु ।