कपिलवस्तुया दोहनीइ मानव बस्तीया प्रमाण

येँ – पुरातात्विक महत्व कुबियाच्वंगु कपिलवस्तुया ऐतिहासिक दोहनी क्षेत्रय् उत्खनन याःगु इलय् अन इशापूर्व प्यसः दँनिसें मानव बसोबास शुरु जूगु सीदुगु दु । पुरातत्व विभागया व्यवस्थापनय् राष्ट्रिय व अन्तर्राष्ट्रिय विज्ञतय् मंकाः पुचलं उत्खनन याःगु इलय् लुया वःगु पुरातात्विक सामग्रीयअ अनुसन्धान लिपा उगु तथ्य पिहां वःगु खः । थनिं दछि न्ह्यः न्हापांखुसी विज्ञतय् पुचलं उगु थासय् उत्खननया ज्या न्ह्याकूगु खः । पुरातत्व विभागया नेतृत्वय् बेलायतया दुरहाम विश्वविद्यालयया विज्ञतय् पुचलं प्रत्यक्ष निगरानीइ उत्खननलिसें अनुसन्धान याना वयाच्वंगु खः ।

उत्खननया झ्वलय् लुया वःगु चाया थलबल, सामग्रीया कुचा व मूर्तिया वैज्ञानिक परीक्षणया लिधंसाय् उगु थासय् प्यसः दँ न्ह्यः हे मानव बस्ती दुगु अनुमान याःगु खः । कपिलवस्तुया सदरमुकाम तौलिहवां करिब ४ किलोमिटर पूर्वपाखे व लुम्बिनीं करिब २० किलोमिटर पश्चिमपमखेया उगु थासय् स्थानीय कुदान, अरौंराकोट नापं तिलौराकोट व लुम्बिनी भ्रमण याइपिं तीर्थालुलिसें कर्मचारी, व्यापारी वयेवने याइगु इलय् झासू लनीगु थाय्या रुपय् प्रयोग जुया वयाच्वंगु खः ।

विभागया इनापय् सन् २०१६ य् बेलायती विश्वविद्यालयं भौगोलिक सर्वेक्षण यानाः जमिनया सतह दुने पूर्ण सुरक्षित अवस्थाय् प्यकुनय्सं ५०÷५० मिटरया गोलाकार बुर्जा लुया वःगु खः । प्राचीन इलंनिसें हे उगु क्षेत्रय् मानव सभ्यताया विकास जूगु प्रमाण लुया वयेवं पुरातात्विक स्तथलया वर्तमान प्रयोग, मूल्य मान्यता व उगु क्षेत्रया अमूर्त सांस्कृतिक सम्पदाबारे स्थानीययात जानकारी याकेगु ल्याखं परामर्श यानागु विभागया प्रवक्ता रामबहादुर कुँवरं जानकारी बियादीगु दु । उगु थासय् उत्खननय् संलग्न विज्ञतय् पुचलं तिलौराकोट दरवार क्षेत्रयात विश्व सम्पदाया धलखय् दुथ्याकेगु निंतिं नं सक्रिय जुयाच्वंगु दुसा थीथी देय्या विज्ञतय् ग्वाहालि थव अनुसन्धान यायेगु ज्या नं जुया वयाच्वंगु दु ।

थ्व झ्वलय् छन्हु निन्हुया दुने थप न्हूगु तथ्य पिहां वये फुगु खोज व अनुसन्धान यानाच्वंगु पुचलं न्ह्यथंगु दु । उगु पुचलं स्थानीय कुदान, निगलिहवा, सिसहनिया, दोहनी, सगरहवा आदि क्षेत्रय् तकं सर्वेक्षण याये धुंकूगु दु । थ्व स्वयां न्ह्यवः सन् २०११ निसें स्वदँ तक लुम्बिनी क्षेत्रय् अनुसन्धान यानाः प्राचीन लुम्बिनी ग्रामया न्हूगु इतिहासलिसें लुम्बिनीया बारे आपालं तथ्य पित हयेगु ज्या जुइ धुंकूगु दु ।अन लुया वःगु तथ्यया लिधंसाय् विश्व परिवेशय् कपिलवस्तुया सभ्यता न्ह्यःने लाःगु जक मखसे संस्कृतिया उत्कृष्ट दु धइगु नं थुइके फइगु पुरातत्वविद् कोशप्रसाद आचार्यं कनादी । न्यागूगु शताब्दीपाखे चिनिया यात्री फासियान व न्हय्गूगु शताब्दीइ हुयेन सांगं उगु क्षेत्रय् याःगु यात्रा व यात्राया लिधंसाय् तयार जूगु विवरणं खोज व अनुसन्धानयात अझ सहज याना बिउगु दु ।

सम्बन्धित बुखँ

LEAVE YOUR COMMENTS