मनपाया नीति तथा कार्यक्रम न्ह्यब्वल

येँ -येँ महानगरपालिकाया गुक्वःगु नगरसभाया बैठक म्हिगःनिसें शुरु जुल । म्हिगःया बैठकय् नगर प्रमुख विद्यासुन्दर शाक्यं नीति तथा कार्यक्रम पेश यानादिल ।
म्हिगःया बैठकं आः नकतिनि वःगु खुसिबालं क्षति जूगु मेलम्ची नगरपालिकायात ग्वाहालि कथं २ करोड तका दां बीगु निर्णय याःगु दु । येँयात लः उपलब्ध याना वयाच्वंग मेलम्ची नगरपालिका व येँ मनपा दथुइ थुगुसी तिनि भगिनी सम्बन्ध स्थापना जूगु खः ।

नीति तथा कार्यक्रम पेश यासें प्रमुख शाक्यं थुगुसी कोरोना महामारीपाखें प्रभावित जूपिं व्यापारी व स्थानीय जनतायात राहत कथं थीथी कथंया कर छुट बीगु घोषणा यानादीगु दु । अथे हे विद्युतीय गाडीयात कर छुट बीगुया नापनापं थाय्थासय् चार्जिङ स्टेशनत चायेकेगु व मेगु निजी संस्थातलिसे सहकार्य कायेगु खँ नं धयादीगु दु । नीति तथा कार्यक्रमय् सहलह यायेगु लागिं थौं नं ११ बजेनिसें नगर परिषद् बैठक च्वनीगु जूगु दु ।

कांग्रेसपाखें बहिष्कार
येँ महानगरपालिकाया गुक्वःगु नगर सभा बैठक नेपाली कांग्रेसपाखें धाःसा बहिष्कार याःगु दु । म्हिगः बैठक शुरु जुइधुंकाः उपमेयर हरिप्रभा खड्गी श्रेष्ठ लगायत वडा अध्यक्ष व वडा सदस्यतय्सं थौंया सभा बहिष्कार यायेगु धकाः हल त्वःताः पिहां वंगु खः । नगर प्रमुख विद्यासुन्दर शाक्यं पेश यानादीगु नीति तथा कार्यक्रमय् थःपिंसं धयागु कार्यक्रम समावेश मयाः धासें नेपाली कांग्रेसपाखें सभा बहिष्कार याःगु खः । कांग्रेसपाखें याःगु थ्व बहिष्कारयात सर्वसाधारणं धाःसा आकिवं जुइगु स्थानीय तहया चुनावया लागिं शुरु यानाहःगु राजनीतिक तयारी खः धयाहःगु दु ।