पत्रकार ज्वंगु विरुद्ध पत्रकारतय् धर्ना

येँ- सर्वोच्च अदालतं रिहा याःगु लगत्तै हे ज्वनाः हिरासतय् तयातःम्ह पत्रकार जितेन्द्र महर्जनयात त्वःतेत माग यासें म्हिगः माइतीघर मण्डलाय् नेवाः पत्रकारतय्सं घौछि धर्ना बिल । नेवाः पत्रकार राष्ट्रिय दबूया संयोजनय् जूगु धर्नाय् रञ्जना लिपि, प्रचलित नेपाल लिपि, अंग्रेजी, देवनागरी लिपि आदिं च्वयातःगु थीथी ब्यानर व प्लेकार्ड नं ब्वयेगु ज्या जूगु खः ।

वैचारिक आस्थाया लिधंसाय् उचित व पर्याप्त प्रमाण मदयेक हिरासतय् तयातःगु धासें दबुलिं धर्ना बिउगु खः। धर्नाय् दबूया केन्द्रीय पदाधिकारी व दुजःपिं नापं स्वनिगःया स्वंगुलिं जिल्लाया प्रतिनिधि, नेपाल पत्रकार महासंघ, आदिवासी जनजाति पत्रकार महासंघ (फोनिज), क्रान्तिकारी पत्रकार महासंघ, क्रान्तिकारी पत्रकार संगठन, प्रेस सेन्टरया प्रतिनिधिपिं नं धर्नाय् एक्यवद्धता क्यँसें सहभागी जूगु खः ।

धर्ना लिपा जूगु बःचाधंगु सभाय् दबूया केन्द्रीय नायः श्रीकृष्ण महर्जन, महासंघया केन्द्रीय दुजः जन्मदेव जैसी, फोनिजया नायः दण्ड गुरुङ, क्रान्तिकारी पत्रकार महासंघया प्रदेश नं. ३ या संयोजक रमेश महतारा, क्रान्तिकारी पत्रकार संगठनया महासचिव बाबुराम भुसाल, दबूया केन्द्रीय मूछ्यांज्ये सुनील महर्जन, सचिव केके मानन्धरं संबोधन यानादीगु खः ।

धर्ना लिपा पत्रकार महर्जनयात हिरासतय् तयातःगु कमलपोखरी प्रहरी वृत्तय् नाप लाः वंपिं दबूया प्रतिनिधिपिंत वृत्तया प्रमुख प्रहरी नायब उपरीक्षक रविन्द्र पौडेलं राज्य विरुद्धया कसुरया द्वपनय् अनुसन्धानया सिलसिलाय् ज्वनागु खँ कंगु खः ।

सम्बन्धित बुखँ

LEAVE YOUR COMMENTS