नेपाल पुचः सरकारय् मवनिगु
येँ – सत्तारुढ गठबन्धनया छगू अंग खयां नं एमालेया माधव नेपाल पुचः प्रधानमन्त्री शेरबहादुर देउवाया सरकारय् सहभागी मजुइगु खँ धाःगु दु । देउवाया सरकारय् मन्त्री जू वनीपिनिगु सांसद पद गुमे जुइगु खतरा दुगु जुयाः नेपाल पुचःया सुं नं सांसद मन्त्री मजुइगु खँ धाःगु दु ।
देउवाया सरकारय् वनेगु लाकि मवनेगु धकाः माधव पुचः दुने जूगु सहलहय् निगू बिचाः पिहां वयेवं नेता नेपालं कानुनी झंझट व नैतिकताया कारणं थःपिं सरकारय् वने मजिउ धकाः स्पष्ट यानादीगु खः ।
नेपाल पुचः दुने खास यानाः ओली क्याम्पय् च्वनाः नं लिपा फ्लोर क्रस याःपिं प्रेम आले, किसान श्रेष्ठपिंसं सरकारय् वने हे माः धकाः सः तःगु खः । तर एमाले दुने अध्यक्ष ओलीलिसे एकताया वार्ता अझ नं न्ह्यानाच्वंगु जुयाः सरकारय् वन धाःसा एकताया वातावरण स्यनेफु धकाः वार्ता पुचःया दुजःतय्सं बः बियाच्वंगु दु ।
प्रेम आले, किसान श्रेष्ठपिंसं धाःसा ओलीं निक्वः निक्वः संसद विघटन याःगु इलय् वने हे धुंकूगु सांसद पदया आः छाय् मोह तयेगु, ओलीं लिकाःसा लिकायेके बिउ धासें सरकारय् वनेमाःगु तर्क तयाच्वंगु दु ।
तर नेपाल पक्षया नेतातय्सं धाःसा ओलीं थःगु पक्षया सांसदतय्त धमाधम पदमुक्त यायां यंकल धाःसा कन्हय् सांसद मगानाः सरकार हे अल्पमतय् लाः वनीगु खतरा दुगु जुयाः सरकारय् वने मजिउगु खँ धायेगु यानाच्वंगु दु ।
अथे खःसां नेपाल पुचलं राष्ट्रिय सभाय् स्वतन्त्र उम्मेदवार जुयाः त्याःम्ह डा. खिमलाल देवकोटायात थःपिनि प्रतिनिधि दयेकाः छ्वये फुगु खँ धाःगु दु । नापं सुं सांसद व्यक्तिगत जोखिम कयाः सरकारय् वने इच्छुक खःसा वयेफु धकाः नं नेपाल पुचलं लँपु खुल्ला याःगु दु ।
मन्त्रालय भागबन्डा मिले जुल
नेपाल पुचः सरकारय् मवनेगु धकाः अन्तिम निर्णय जुइवं आः देउवा सरकारं माओवादी केन्द्र व जसपाया सांसदत तयाः सरकारयात पूर्णता बीगु जूगु दु । थुकिया लागिं मन्त्रालयया भागबन्डा नं मिले याःगु दु । आः कांग्रेसं प्रधानमन्त्री सहित च्यागू मन्त्रालय, माओवादी केन्द्रयात न्हय्गू व जसपायात नं न्हय्गू हे मन्त्रालय बीगु सहमति जूगु दु ।
नेपाल पुचःया नेतातय्त धाःसा थीथी थासय् राजनीतिक नियुक्ति बियाः क्षतिपूर्ति यायेगु सहमति नं जूगु दु । माओवादी केन्द्र व जसपा दुने मन्त्री जुइत इच्छुकपिंसं सांसदत यक्व दयाः नेतातय्त समस्या जुयाच्वंगु खँ धाःगु दु ।
LEAVE YOUR COMMENTS