भारतं न्याना काल नेपाःया विद्युत

येँ – नेपाःया इतिहासय् हे न्हापांखुसी भारतयात विद्युत मीगु ज्याया आरम्भ जुइगु जूगु दु । उकिया लागिं भारतं नेपाःयात अनुमति बिउगु दुसा आः नेपालं भारतयात ध्यबा कयाः विद्युत मीगु जूगु दु ।
थुकिया लागिं न्हापांगु चरणय् नेपालं ३९ मेगावाट मत निं भारतयात मीगु जूगु दु । थुकिया लागिं नुवाकोटया त्रिशुलीपाखें २४ मेगावाट व देवीघाटया १५ मेगावाट मत भारतय् मीगु तयारी यानाच्वंगु दु ।

थ्व ब्यापार मंगलवाः चान्हसिया १२ बजेनिसें शुरु जूगु खः । ढल्केवर– मुजफ्फपुर ४०० केभीया विद्युत लाइनं थ्व मत मीगु ज्या जुइत्यंगु खः । थ्व विद्युत लाइनपाखें नेपालं आः तक मत न्याना कायेगु ज्या जक याना वयाच्वंगु खःसा म्हिगःनिसें वहे लाइनं विद्युत मीगु ज्या नं शुरु याःगु खः । थ्व ज्याया नापनापं नेपाः व भारतया विद्युत कारोवार न्हूगु चरणय् प्रवेश जूगु खँ उर्जा मन्त्री पम्फा भुषालं कनादिल ।

थ्व मत भारतय् न्हिंन्हिं जुइगु मूल्य निर्धारण प्रणाली अन्तर्गत मीगु ज्या जुइ । थुकियात खुल्ला प्रतिस्पर्धाया नीति धाःगु दु । वकुन्हुया मूल्य निर्धारण जुइवं चान्हसिया १२ बजेनिसें कन्हय्या चान्हय् १२ तक वहे भावं मत मीगु ज्या जुइ । उकिं थ्व विद्युत मियाः थुलि हे ध्यबा दुहां वइ धकाः न्ह्यव हे अनुमान याये फइ मखु ।

थौंकन्हय् भारतय् कोइला आपूर्ति जुइ मफयाः मतया भाः तसकं थहां वनाच्वंगु दु । थौंकन्हय् अन प्रति युनिट २८ भारुया भावं मत न्यायेगु ज्या जुयाच्वंगु दु । तर नेपाःपाखें न्याना काइगु मतया भाः थुलि हे जुइ धाये मफुसां थुकिया जःखः जुइगु अनुमान यानातःगु दु ।

नेपालं आःयात भारतय् म्हो मात्रा जक विद्युत मीगु ज्या यानाच्वंगु खःसां लिपा थ्व मात्रा बढे जुया वनीगु अनुमान यानातःगु दु । थ्व मत खास यानाः नेपाःया म्वाःगु इलय् उत्पादन जुइगु जक छ्वइगु खँ नं धाःगु दु ।

‘स्वन्तियात ढुक्कं मत च्याकादिसँ’
विद्युत प्राधिकरणया कार्यकारी प्रमुख कुलमान घिसिङं थुगुसीया स्वन्ति नखतय् नं ढुक्कनक्सां मत च्याकेत सकसितं इनाप यानादीगु दु । स्वन्ति नखःया लागिं माक्व विद्युत उत्पादन जुइगु खँ कँसें वय्कलं स्वन्तिजःछि गनं गबलें नं मत मसीगु खँ नं कनादिल । म्हिगः पत्रकारतलिसे जूगु भेटघाट ज्याझ्वलय् न्ववासें वय्कलं थ्व खँ कनादीगु खः । थुगुसी स्वन्ति नखःया लागिं करिब १५०० मेगावाट मत मालीगु अनुमान थःपिंसं यानागु व वहे कथं तयारी यानाच्वनागु जानकारी नं वय्कलं बियादिल ।

थौंकन्हय् आकाझाकां झ्याप्प मत वनेगु यानाच्वंगु समस्या बारे कँसें वय्कलं धयादिल, ‘थ्व समस्या खास यानाः ट्रान्समिटरया कारणं जूगु खः । थाय्थासय् पुलां जुयाः ट्रान्समिटर स्यनाच्वंगु दु । आः फुक्क थासय् व्यापक रुपं ट्रान्समिटर दयेकेगु अभियान न्ह्याकेत्यनागु दु ।’

सम्बन्धित बुखँ

LEAVE YOUR COMMENTS