तोखाया धर्म संस्कृति सम्बन्धी सफू
येँ(नेपालभाषा टाइम्स)÷तोखाया पत्रकार हिक्मत डंगोलं च्वयादीगु तोखाया धर्म, संस्कृति, सम्पदा सम्बन्धी सफू पिदंगु दु । पत्रकार डंगोलं च्वयादीगु ‘टोखाका धार्मिक तथा सांस्कृर्तिक सम्पदा’ नांया सफू तोखा नगरपालिकाया प्रमुख प्रकाश अधिकारीं पितब्वज्या यानादीगु खः ।
सफुतिइ लिच्छवीकालय् हे अस्तित्वय् वःगु धयातःगु तोखा देय्या इतिहास, विविधतासहितया बसोबासया विषययात चर्चा यानातःगु दु । मूल रुपं तोखाया रैथाने जातिकथं कयातःगु नेवाःतय् धार्मिक, सांस्कृतिक, ऐतिहासिक नखःचखः, जात्रा, पर्वलिसें तोखाया नेवाःतय्सं विशेष महत्वया बियाः हना वयाच्वंगु बिस्काः जात्रा व खड्ग जात्राय थीथी पक्षयात सफूतिइ चर्चा यानातःगु दु । तोखा साहित्य दबूया नायः बाबुलाल डंगोलया सभापतित्वय् जूगु ज्याझ्वलय् प्रा. सुरेन्द्र केसी, बौद्धिक व्यक्तित्व भिक्टर प्रधान, आर्र्टिटेक्ट सुरेन्द्र खनाल, ३ वडाअध्यक्ष रमेश डंगोल लगायतं च्वमि व सफूया थीथी पक्षयात कयाः चर्चा यानादीगु खः ।
पितब्वज्या जूगु सफुतिइ तोखाया नेवाःतय्सं हना वयाच्वंगु धार्मिक नखःचखः जात्रा, पर्व, भजन, संस्कृतियात छगू खण्डय् दुथ्याकातःगु दुसा तोखाया बिस्काः व खड्ग जात्रायात मेगु खण्ड चर्चा यानातःगु दु । तोखाया बारे अझ थप अनुसन्धानय् याये फत धाःसा इतिहासया मेमेगु पक्षयात नं थुइके फइगु व उकिया निंतिं पितब्वज्या जूगु सफू सहयोगी जुइगु विश्वास वक्तातय्सं प्वंकूगु दु ।
ज्याझ्वलय् तोखा साहित्य दबूया चिनाखँ मुना सफूया नं पितब्वज्या याःगु खः ।
LEAVE YOUR COMMENTS