ने. सं. ११४४ चौलागा दुतिया -

म्हिगः नं येँ मनपाया प्यंगू वडाय् बन्द

येँ (नेपालभाषा टाइम्स) – कोरोना भाइरसया कारण येँया छुं छुं थासय् संक्रमण खनेदयेवं म्हिगः नं येँया २१, २२, १२, २७ वडाय् पसःत पूर्ण रूपं बन्द जूगु दु ।

म्हिगः १२ वडाया वन्डे लागाय् च्वंम्ह ७८ दँ दुम्ह जिथि मदयेवं उगु थासय् नं सिल याःगु खः । स्वन्हु न्ह्यः जक झाडा वान्ता जूम्ह उम्ह जिथियात टेकुया अस्पतालय् यंकूगु खःसा अन भर्ना मकायेवं यलया पाटन अस्पतालय् यंकूगु खः । पाटन अस्पतालय् नं भर्ना मकायेवं यलया हे किस्ट अस्पतालय् भर्ना याःगु खःसा म्हीगः चान्हय् मदुगु खः । म्हीग बहनी हे ज्याथिया स्वाब काःगु खःसा उकिया रिर्पोट पोजिटिभ वःगु खः । मदुम्ह विरामी सुगर, थाइराइड लिसे थीथी ल्वचं ग्रस्त जूगु खँ १२ वडाया स्वास्थ्य क्लिनिकया प्रमुखं जानकारी बिउगु दु ।

लिसें मदुम्हेसिया छेँजःपिं हे स्वास्थ्य क्षेत्रय् लगे जुयाच्वंपिं जूगु खँ नं धाःगु दु । छेँय् च्वनाच्वंम्ह उम्ह जिथियाके कोरोना पोजिटिभ वयेवं म्हिगः हे छेँजःपिनिगु स्वास्थ्य परीक्षण यायेगु तयारी यानागु खःसां नं येँ महानगरपालिकाया जनस्वास्थ्य विभागं ई मदुगु धासें थौं जक छेँजःपिनिगु स्वास्थ्य परीक्षण यायेगु तयारी यानाच्वंगु खँ नं उम्ह स्वास्थ्य क्लिनिकया प्रमुखं ‘नेपालभाषा टाइम्स’ यात कनादीगु दु ।

मदुम्ह जिथिया म्हिगः हे पशुपति आर्यघाटय् अन्तिम संस्कर जूगु दु। म्हिगः छेँजःपिं सुयातं मतसें अन्तिम संस्कार यायेगु ज्या जूगु खँ १२ वडाया दुजः पुष्प प्रजापति (नातिं) ‘नेपालभाषा टाइम्स’ यात कनादीगु दु। वय्कलं धयादी, ‘मदुम्हेसित संक्रमणया पुष्टि जुइधुंकाः छेँजःयात पिने हयेगु जुइमखु, अथे जुयाः मदुम्हेसिया काय्चापिं तयाः दाहसंस्कार यानागु खः ।’