देय् दबूया राष्ट्रिय परिषद्या मुँज्या जुइगु
येँ(नेपालभाषा टाइम्स)÷नेवाः देय् दबूया न्हापांगु राष्ट्रिय परिषद्या मुँज्या वइगु शनिवाः जुइगु जूगु दु । थनया टेकुइ च्वंगु मसला कटेजय् उगु मुँज्या जुइ ।
थगुने चिल्लागा एकादशि (चैत १४)निसें स्वन्हुयंकं धरानय् जूगु न्हय्क्वःगु तःमुँज्या न्हूगु ज्यासना पुचः ल्ययेधुंकाः देय् दबूया न्हूगु विधानं परिकल्पना याःकथं गठन जूगु राष्ट्रिय परिषद्य न्हापांगु मुँज्या जुइत्यंगु खः ।
राष्ट्रिय परिषदया मुँज्याय् १०२ म्ह प्रतिनिधिं ब्वति काइगु खँ देय् दबुलिं जानकारी बिउगु दु । देय् दबूया कथं राष्ट्रिय परिषदय् केन्द्रीय ज्यासना पुचःपाखें ४५म्ह, सल्लाकार पुचःपाखें १५ म्ह, प्रदेश समितिपाखें च्याम्ह, अध्यक्षपाखें मनोनित विषयविज्ञ न्याम्ह, जातीय परिषद्पाखें न्याम्ह व च्यागुलिं प्रदेशं ल्यःपिं २३ म्ह व देय् दबूया विषयगत कवः (भातृ संगठन)या नायः नापं यानाः १०२ म्ह प्रतिनिधिंं ब्वति काइ ।
तःमुँज्या लिपाया निगूगु तःधंगु संरचनाकथं कयातःगु राष्ट्रिय परिषदया मुँज्याय् महाधिवेशनपाखें पारित जुयाः आतकया दुने याःगु ज्या, वइगु आर्थिक दँया निंतिं बजेट अनुमोदन यायेगु नापं दछियंकं जूगु प्रगति विवरण व भावी कार्ययोजना पेश यानाः उकियात अनुमोदन याइगु देय् दबूलिं जानकारी बिउगु दु ।
अथे हे केन्द्रीय कार्यसमितिं प्रस्ताव याइगु विधान संशोधनया नं अनुमोदन याइगु देय् दबुलिं धाःगु दु ।
LEAVE YOUR COMMENTS