प्रज्ञाय् निखेरं नयाच्वंगु भत्ता रोक्का

येँ (नेपालभाषा टाइम्स)- नेपाल प्रज्ञाप्रतिष्ठानं प्रतिष्ठानया आजीवन दुजःया जुयाः निखेरं सुविधा काये मदइगु नियमयात अनुमोदन याःगु दु । प्रतिष्ठानया म्हिगः च्वंगु साधारण सभां थ्व निर्णय याःगु खः ।

सरकारया मेगु निकायपाखें पेन्सन कयाः नं प्रज्ञा प्रतिष्ठानया आजीवन दुजः जुयाः हानं मेगु भत्ता कयाच्वंपिं झिंछम्ह दुजःया भत्ता रोके यायेगु निर्णय प्रतिष्ठानं याःगु खः । प्रतिष्ठानया आजीवन दुजःपिं प्राडा वासुदेव त्रिपाठी, प्राडा चूडामणि बन्धु रेग्मी, गङ्गाप्रसाद उप्रेती, प्राडा योगेन्द्रप्रसाद यादव, तीर्थबहादुर श्रेष्ठ, आरडी ‘प्रभास’ चटौत (राजेश्वरीदत्त चटौत), अशेषकुमार मल्ल, डा. धुवचन्द्र गौतम, तोया गुरुङ, तुलसीप्रसाद जोशी (तुलसी दिवस) व शशीविक्रम शाहं सरकारया हे मेगु निकायपाखें नियमित पेन्सन कयाः नं हानं प्रतिष्ठानया आजीवन दुजः जुयाः नियमित भत्ता कायेगु यानाच्वंगु खः । वय्कःपिंसं आजीवन दुजः कथं लय् करिब ५० द्वः तका भत्ता कायेगु यानाच्वंगु दु ।

प्रतिष्ठानय् वःगु न्हूगु नेतृत्वं थ्व भत्ता रोके याना बीवं उकिया विरुद्ध सर्वोच्च अदालतय् रिट नं लानाच्वंगु दु । थुकिया विरुद्ध आकाश ढकालं वंगु चैत १२ गते सर्वोच्चय् रिट तःगु खः ।

तर प्रतिष्ठानया कुलपति भुपाल राईं धाःसा निखेरं सुविधा कायेगु ज्यायात पनेमाः धइगु थःपिनि कुतः खः, उकिं कन्हय् वनाः सर्वोच्च अदालतं मेकथंया फैसला यात धाःसा वहे कथं थःपिंसं नं निर्णय हिलेगु खँ कनादीगु दु । सर्वोच्च अदालतं प्रतिष्ठान विरुद्ध प्राडा वासुदेव त्रिपाठीसहित ११ म्ह आजीवन दुजःतय्सं तयातःगु रिटयात कयाः कुलपति, उपकुलपति, सदस्य सचिव व प्रज्ञापरिषद्या दुजःतय्त थुकी अन्तरिम आदेश छाय् जारी यायेम्वाः धकाः न्यनेत म्हिगः हे सःतूगु दु ।