शताब्दीपुरुष जोशीया ‘बैद्य बा’ फिल्मया पर्दाय्
येँ (नेपालभाषा टाइम्स)÷ वाङमय शताब्दि पुरुष सत्यमोहन जोशीया च्वसां पिदंगु ‘बैद्य बा’ नाटक आः संकिपाया रुपय् फिल्मया पर्दाय् पिलूवइगु जूगु दु ।
नांजाम्ह साहित्य अन्वेषक भाषाविद् पन्नाप्रसाद जोशीया जीवनया छगू घटनालिसे स्वापू दुगु थ्व प्याखंयात शान्तराज शाक्यं संकिपाया रुपय् हयादीगु खः । ‘गुरुमापा’ व ‘यलयबाथः’ थेंजाःगु नेवाः फिल्मया नापनापं पन्चदान, दिपंखा लगायत आपालं डकुमेन्ट्री दयेकादीधुंकूम्ह शाक्यया निर्देशनय् ‘बैद्य बा’ संकिपा स्वयेदइगु जूगु दु ।
थ्व संकिपाय् शरद कसाःनं बैद्य बाया मू भुमिका म्हितादीगु दुसा पुर्णिमा शाक्य, नवीन थेच्वमि, धर्मकृष्ण श्रेष्ठ, सोनी श्रेष्ठ, हिक्मत श्रेष्ठ व मचा कलाकार श्रीज्ञा शाक्य लगायत आपालं कलाकारपिंसं थीथी भूमिकाय् म्हितादीगु दु ।
थ्व संकिपाया छायाँकार सिद्धार्थ शाक्य व संजोग श्रेष्ठ, सम्पादन संजीवन शाक्य व सहनिर्दशक कृष्ण प्रजापति खः । शताब्दीपुरुष जोशीया नाट्य कृति “बैद्य बा” या संकिपाया रुपय् शान्तराज शाक्यं च्वयादीगु खः । लोकसाहित्य परिषद्या निर्माणय् तयार जूगु थ्व संकिपाया निर्माण व्यवस्थापक राजित बहादुर श्रेष्ठ खः ।
LEAVE YOUR COMMENTS