नेपालभाषा पुनस्र्थापनाया माग

येँ – स्वनिगःया गुलि नं क्याम्पसय् न्हापा नेपालभाषा ब्वंकेगु यानाच्वंगु खः, अन आः नं नेपालभाषा ब्वंकेगु कथं पुनस्र्थापना यायेमाःगु माग नेवाः विद्यार्थी युनियनं याःगु दु । थनया आरआर क्याम्पसय् नेवाः विद्यार्थी युनियनं याःगु छगू ज्याझ्वलय् थ्व माग न्ह्यःने तःगु खः ।

युनियनपाखें थुकिया नापनापं नेपालभाषा ब्वनीपिं विद्यार्थीतय्त छात्रवृत्तिया व्यवस्था यायेमाःगु, नेपालभाषा ब्वंकीपिं शिक्षकतय् लागिं दरबन्दी खोले यायेमाःगु, विद्यार्थीतय्त माःगु पाठ्यसफू इलय् छापे याना बीमाःगु माग नं न्ह्यःने तःगु दु ।

नेवाः न्ह्यलुवा डा. महेशमान श्रेष्ठ मूपाहां कथं झायादीगु उगु ज्याझ्वलय् क्याम्पस प्रमुख डा. निर्मला कुमारी सुवालं त्रिवि नियमं यानाः क्याम्पस प्रमुखतय्सं चाहे जूसां नं सकथासं नेपालभाषा ब्वंके मफयाच्वंगु खँ कनादिल । स्ववियु उपाध्यक्ष मदन भण्डारीं नेपालभाषा ब्वंकेगु लागिं नेवाः विद्यार्थीतय्सं यानाच्वंगु संघर्षयात थःपिनिगु समर्थन व्यक्त यानादिल । आरआर क्याम्पसय् नेपालभाषा पुनस्र्थापना यायेत संघर्ष याःपिं विद्यार्थीतय्त हनेज्या नं जूगु उगु ज्याझ्वलय् विद्यार्थी मनिष नेवाःलं नं न्ववानादीगु खः ।

सम्बन्धित बुखँ

LEAVE YOUR COMMENTS