‘नेवाःतय्गु गुथि स्वायत्त जुइमाः’

येँ- सरकारं संसदया थ्वहे अधिवेवशनय् हानं हयेत्यंगु गुथि विधेयक बारे नेवाः समुदायं छगू हे मत दयेकूगु दु । म्हिगः च्वंगु थ्व सम्बन्धी मुँज्यां नेवाः आदिवासीतय्गु गुथियात सरकारं स्वायत्तता व स्वतन्त्रता बीमाःगु खँय् छगू हे मत कायम याःगु दु । लिसें नेवाःतय्गु गुथिया सवालय् सरकारं बिस्कं कानून दयेकेमाःगु खँय् नं नेवाः समुदायं छगू हे मत तयार याःगु दु ।

थ्वहे अवधारणाया आधारय् सरकारं गुथि सम्बन्धी विधेयक तयार यायेमाःगु माग नेवाःतय्सं याःगु दु । आः गुथि वियेधक विरुद्धया एकीकृत आन्दोलनं थ्व अवधारणायात लिखित रुपय् च्वयाः नेवाःतय् थीथी गुथि व जातीय समुदाययात छ्वया बीगु व अनं वःगु सुझावया आधारय् सरकारयात माग न्ह्यब्वयेगु निर्णय नं याःगु दु ।

थ्वहे झ्वलय् भूमिसुधार मन्त्री पद्मा अर्यालं थौं गुथि विधेयक सम्बन्धी खँ ल्हायेगु लागिं थौं स्वनिगःया सांसदतय्त सःतूगु खँ सीदुगु दु । सदनय् विधेयक यंके न्ह्यः राय कायेत वय्कलं सःतादीगु खँ धाःगु दु ।