दरबार मार्ग घटना बलात्कार हे जूगु पुष्टि

प्रहरीयात कारवाहीया सिफारिश

येँ छुं न्हि न्ह्यव दरवारमार्गया ल्यान्डमार्क होटलय् जूगु घटना सामुहिक बलात्कार हे जूगु खँ प्रहरीं धाःगु दु । थ्व घटनाय् छानविन यायेत गठन याःगु समितिं बिहिवाः प्रतिवेदन लःल्हासें उगु घटना सामुहिक बलात्कार हे जूगु व थ्व घटना सुचुकेत ल्हाःदुपिं प्रहरीतय्त नं गुलि जिउ उलि कारवाही यायेत सिफारिश याःगु दु ।

काठमाडौं प्रहरी परिसरया एसपी रामदत्त जोशीया नेतृत्वय् दयेकूगु छानविन समिति बिउगु प्रतिवेदनय् लिपा छानविनय् घटना सुचुकेत प्रहरीं ध्यबा काःगु पुष्टि जुल धाःसा उमित फौजदारी कारवाही यायेमाःगु खँ न्ह्यथनातःगु दु ।

प्रतिवेदनय् २१ दँया मिसायात वया कठीत प्रेमी शैलेश कार्की, विकास गौतम, दीपक श्रेष्ठ व रवि पौडेलं बलात्कार याःगु खँ न्ह्यथनातःगु दु । थ्व घटनायात उजुरी याःवःम्ह मिसायात ह्ययेकाः प्रहरीं हे सहमतिइ यौन स्वापू कायम जूगु धकाः भ्वँ दयेकेबिउगु खः ।

माघ ७ गते बलात्कार लिपा पीडित मिसां थःत बलात्कार जुल धकाः दरवारमार्गया प्रहरीइ मौखिक उजुरी बिउगु खः । लिपा प्रहरीं घटनास्थलय् स्वयेधुंकाः वया प्रेमी धाःम्ह शैलेश कार्कीया छेँजः व मिसाया छेँजःपिं हयाः मिसायात ध्यबा बियाः मिलापत्र याकूगु खः ।

छानविनया झ्वलय् मिसां थःम्हं सहमतिं हे स्वापू कायम यानागु, लिपा तंया झोंकय् जक उजुरी बियागु धकाः बयान बिउगु खः । प्रहरीं अनुसन्धान याःबलय् मिसाया मांया खाताय् आकाझाकां २७ लाख तका दुहां वःगु व थ्व ध्यबा गनं वःगु धयागु पुष्टि मजूगुलिं घटना सुचुकेत हे ध्यबा कालबिल जूगु निष्कर्ष पिकाःगु खः ।

थ्व मिलापत्र याकेत संलग्न दरबारमार्ग वृत्तया तत्कालिन डिएसपी तिलक भारती, इन्स्पेक्टर लक्ष्मण सिंह ठकुरी व सब इन्स्पेक्टर चन्द्रबहादुर भण्डारी ध्यबा काःगु दु मदु धयागु पुष्टि मयाःनि । तर प्रहरीया मिलोमतो हे मिलापत्र याकूगु धासें ध्यबा काःगु पुष्टि जुइवं फौजदारी कारवाही यायेत प्रतिवेदनय् सिफारिस यानातःगु दु ।

घटना सार्वजनिक जुइवं प्रारम्भिक अनुसन्धान लिपा हे इन्स्पेक्टर ठकुरी व सब इन्स्पेक्टर भण्डारीयात निलम्बन यायेधुंकूगु दुसा डिएसपी भारतीयात दरबारमार्ग वृत्तं चिइकेधुंकूगु दु ।