समृद्ध नगर दयेकेगु योजनाय् तीव्रता
येँ – येँ महानगरयात समृद्ध नगर दयेकेगु योजना तीव्र गतिं न्ह्याः वंगु दु । येँ महानगरपालिकां येँ महानगरयात सुन्दर व समृद्ध नगर दयेकेगु योजना न्ह्यःने हःगु खः । येँ महानगरयात समृद्ध यायेगु येँ मनपाया योजनाकथं थीथी ज्यात तीव्र गतिं न्ह्याःगु दु । येँ महानगरपालिकाया प्रमुख विद्यासुन्दर शाक्यं येँया सामाजिक, वातावरणीय व सम्पदानिसें स्मार्टसिटीया अवधारणाकथं ज्या न्ह्याः वनाच्वंगु धयादीगु दु ।
महानगर प्रमुखया कुतलं ज्याथजिथि व अपांगता जूपिंत छेँय्छेँय् वनाः सामाजिक सुरक्षा भत्ता वितरण यायेगु ज्या जूगु व नगरपालिकां म्हइगु थीथी कथंया करय् नं छ्यापं बीगु गृहकार्य शुरु जूगु नं प्रमुख शाक्यं धयादिल । थनया येँ महानगरपालिका वडा नं. १५ य् लाःगु चःमति लागाय् महानगरपालिकाया हे कुतलय् सतकया स्तरोन्नति यायेगु नापं न्हूसतकय् स्मार्ट पार्किङ निर्माण नापं विश्व सम्पदा क्षेत्रय् निःशुल्क वाइफाइया व्यवस्था यायेगु पहल नं जुयाच्वंगु महानगरपालिकां न्ह्यथंगु दु ।
थ्व हे झ्वलय् येँ महानगर दुने गुलिखे निजी छेँ व भवन नक्सा पास मयासे हे निर्माण यानातःगु व उकथं छेँ वा भवन निर्माण यायेगु प्रवृत्तियात न्यूनिकरणया निंतिं सम्बन्धित व्यक्तियात नक्सा पास यायेगु मौका बिया वयाच्वंगु दु । अथे हे स्वनिगःया दकलय् तःधंगु समस्याया रुपय् खने दयाच्वंगु फोहरया दीर्घकालीन समस्या समाधानया निंतिं फोहरयात सही थासय् दीर्घकालीन रुपं विसर्जन यानाः प्रांगारिक साः दयेकेगु व हाकनं छ्यले जिउगु ज्याय् नं महानगरपालिकां विशेष ध्यान बिया वयाच्वंगु दु ।
LEAVE YOUR COMMENTS