दान्यहिरा सिरपाः स्वम्हेसित

यल(नेपालभाषा टाइम्स)- नेपालभाषा एकेदेमिपाखें दँय्दसं लःल्हाना वयाच्वंगु दान्यहिरा सिरपाः थुगुसी स्वम्ह विशिष्ट योगदान बियादीपिं व्यक्तित्वपिंत लःल्हाइगु जूगु दु । एकेदेमिपाखें दँय्दसं लःल्हाना वयाच्वंगु थुगु सिरपाः थुगुसी भाषा साहित्य, संगीत व विज्ञान प्रविधिया ख्यलय् योगदान बियादीपिंत लःल्हायेत्यंगु खः ।

भाषा, साहित्य, संस्कृतिया ख्यलय् ज्वःमदुगु योगदान बिया वयाच्वनादीम्ह व्यक्तियात लःल्हाना वयाच्वंगु थुगु सिरपाः थुगुसी साहित्य व संस्कृतिया ख्यलय् बियादीगु विशिष्ट योगदानयात कयाः एकेदेमिया पुलांम्ह चान्सलरलिसें थौंकन्हय् संरक्षक जुयाच्वनादीम्ह वाङमय शताब्दी पुरुष सत्यमोहन जोशीयात बीत्यंगु खः ।

एकेदेमिया चान्सलर यज्ञरत्न धाख्वां थः मांअबुया नामं स्वनादीगु थुगु सिरपाः थ्वयां न्ह्यःतक छगू दँय् साहित्य व मेगु दँय् संगीत ख्यलय् योगदान बियादीपिंत बीगु याना वयाच्वंगु खःसा थुगुसीनिसें साहित्य व संगीत निगुलिं ख्यलय् बीगु जूगु दु ।

अथे हे थुगुसी संगीत ख्यःपाखे प्यंगू दशक न्ह्यवंनिसें सांगीतिक ख्यलय् विशिष्ट योगदान बिया वयाच्वनादीम्ह नांजाःम्ह संगीतकार मनराजा नकःमियात बीगु जूगु दु । थुकथं हे विज्ञान प्रविधिया ख्यलय् विशिष्ट योगदान बियादीम्ह डा. केशरी लक्ष्मी मानन्धरयात बीगु जूगु दु ।

थुगुसीया सिरपाःया निंतिं साहित्य, संगीत व विज्ञान प्रविधि ख्यःया विज्ञपिं दुथ्याःगु स्वंगू बिस्कं बिस्कं समिति नीस्वंगु खः ।

मेखे दान्यहिरा सिरपाःलिसें निम्हेसित लःल्हायेगु याना वयाच्वंगु दान्यहिरा हःपाः सिरपाः धाःसा थुगुसीनिसें मबीगु निर्णय जूगु एकेदेमिया सदस्य सचिव डा. पुष्पराज राजकर्णिकारं जानकारी बियादीगु दु ।

सदस्य सचिव डा. राजकर्णिकारं बियादीगु जानकारीकथं वइगु कौलागा चः¥हे (कात्तिक ६ गते) छगू ज्याझ्वः यासें सिरपाः लःल्हाइगु जूगु दु ।