भीआईपी लागाय् पुलुकिसि वने मदु !
येँ (नेपालभाषा टाइम्स)÷नेवाः संस्कृति बारे मथूपिं प्रहरी व प्रशासकतय् कारणं म्हीग यँयाःया पुलुकिसियात लँ पनाः अवरोध पिकायेगु ज्या यात । म्हीग बहनी जमलं लाजिम्पाट–पाखे वनाच्वंगु पुलुकिसिया लँ पनाः प्रहरीं न्ह्यःने वने दइ मखु धकाः अवरोध पिकाःगु खः ।
जमलं च्वय् उपराष्ट्रपतिया निवासय् थ्यंकाः थनं च्वय् यंके दइ मखु धकाः लँ पंगु खः । पुलुकिसि पुचलं अथे छाय् धकाः न्ह्यसः तःबलय् प्रहरीं थ्व भीआईपी एरिया जूगुलिं थन थन थज्याःगु यात्रा याये मजिउ धकाः लिसः बिउगु खः । वयां लिपा पुचलं पुलुकिसि अन हे दिकाः बाजं समेत बँय् तयाः विरोध याःगु खः । लिपा प्रहरीं थीथी थासय् फोन यानाः पुलुकसियात न्ह्यःने वने बिउगु खः ।
यँयाः जात्रा क्वचाल
थुगु दँया यँयाः जात्रा म्हिगः क्वचाल । म्हिगः हनुमानध्वाखाया यःसिं क्वःथलाः येँयाः सम्पन्न याःगु खः । म्हिगः बहनी ८ः३९ बजेया साइतय् यःसिं क्वःथःगु खः । क्वःथःगु यःसिं टेकुइ वायेयंकूगु खः ।
म्हिगः कुमारीया नानिचा याः नं याःगु खः । कुमारीया रथयात म्हिगः किलागः लागाय् सालाः याः न्यायेकूगु खः । जुजु जयप्रकाश मल्लया यःम्ह मिसा (नानि) या छेँक्वं कुमारी सालीगु जूगुलिं थ्वयात नानिचायाः धाःगु खः धइगु धापू दु । मिसाया नापं रथ साला तःगु जूगुलिं म्हिगः मिसापिंसं जक रथ सालाः याः न्यायेकूगु खः ।
कुमारीया रथ सालेधुंकाः म्हिगः बहनी राष्ट्रप्रमुखया ल्याखं राष्ट्रपतिं कुमारी, गणेश व भैरवया ल्हातिं सिन्हः तीगु चलन दु । थुकिया लागिं राष्ट्रपति कुमारी छेँय् झाइगु खः ।
LEAVE YOUR COMMENTS