बाराय् यादवयात बुकेत जनमत पार्टीया मोर्चा

येँ (नेपालभाषा टाइम्स)- उपराष्ट्रपति पदय् रामसहायप्रसाद यादव निर्वाचित जुइधुंकाः खाली जूगु बारा–२ या चुनाव क्षेत्रं जसपाया अध्यक्ष उपेन्द्र यादव दनेगु धकाः तयारी यानाच्वंगु दुसां अन वय्कःयात बुकेगु लागिं मेगु मधेसवादी दलतय्सं हे कुतः यानाच्वंगु खँ सीदुगु दु ।

बाराय् वय्कःयात बुकेत जनमत पार्टीया अध्यक्ष सीके राउत सक्रिया जुयाच्वंगु खँ धाःगु दु । राउतं बाराय् यादवयात हाथ्या बीफुम्ह उम्मेदवार मालाच्वंगु खँ नं धाःगु दु । अन यादवयात हाथ्या बीगु लागिं सीके राउतं नागरिक उन्मुक्ति पार्टी व लोसपाया समेत साथ कायेत स्वयाच्वंगु खँ नं धाःगु दु ।

मधेस लागाय् आः नापं हे ज्याखँ न्ह्याकेगु धकाः जनमत, नाउपा व लोसपा दथुइ छुं ई न्ह्यः तिनि सहमति पत्रय् हस्ताक्षर जूगु खः । सिरहाय् यादवयात सिके राउतं हे बुकूगु खः ।

मेखे यादवयात त्याकेगु लागिं वर्तमान सत्ता गठबन्धनं कार्यगत एकता यायेगु तयारी नं यानाच्वंगु दु । थ्व सत्ता गठबन्धन दुने जसपा, नाउपा, लोसपा व जनमत प्यंगुलिं पार्टी दुथ्याः । अथे खःसां चुनावी मोर्चाय् धाःसा जनमत, नाउपा व लोसपा छखे अले बाँकी पार्टी मेखे जुइगु सम्भावना खने दया वःगु दु । जनमत पार्टीं वर्तमान गठबन्धन सरकार दयेकेत जक खः, चुनाव ल्वायेत मखु धइगु तर्क तयेगु यानाच्वंगु दु ।