ने. सं. ११४३ ञलागा चौथी -

चोभारय् सुख्खा बन्दरगाह मखु पर्यटन केन्द्र

येँ – चोभाःयात सुख्खा बन्दरगाह दयेकेगु निर्णय यदि सरकारं यात धाःसा तच्वःगु आन्दोलन यायेगु ख्याच्वः स्थानीय वासिन्दां बिउगु दु । शनिवाः स्थानीय वासिन्दा व जनप्रतिनिधि दथुइ जूगु वृहत अन्तक्र्रिया ज्याझ्वलय् स्थानीय वासिन्दां उगु ख्याच्वः बिउगु खः ।

ज्याझ्वलय् न्ववासें १० नम्बर क्षेत्रया सांसद राजेन्द्रकुमार केसीं चोभाः लागा प्राकृतिक, धार्मिक, ऐतिहासिक सम्पदा ल्यंकेत स्थानीय जनतां याइगु गुगुं नं कथंया आन्दोलनयात थःगु समर्थन दइ धयादिल । वय्कलं चोभालय् सुख्खा बन्दरगाह तयेगु उचित मजू धासें चोभाः लागा बचे यायेगु निंतिं राजनीतिक पूर्वाग्रह मतसे न्ह्याःवनेमाःगु खँय् बः बियादिल ।

वय्कलं स्थानीय समुदायं ल्ह्वंगु न्यायोचित मागयात कयाः थः नं क्रियाशिल जुयाच्वनेगु खँ कनादिल । अथेहे सांसद पुकार महर्जनं चोभाः क्षेत्रया संरक्षण व विकासया निंतिं सुख्खा बन्दरगाह गुगुं नं दृष्टिकोणं पाय्छि मजू धासें मुक्कं नगरपालिकाया पर्यटन विकास अभियानया केन्द्रविन्दु चोभाः जूगुलिं चोभाःया निंतिं स्थानीय जनतां याइगु आन्दोलनय् थःपिं न्ह्याबलें लिसें दइ धयादिल ।

चोभार संरक्षण समितिया ग्वसालय् जूगु उगु ज्याझ्वलय् चोभाः लागाय् अन्तर्राष्ट्रि सम्मेलन केन्द्र, अन्तर्राष्ट्रिय स्तरया प्रदर्शनी स्थल, चोभारं सगरमाथा स्पष्ट खनेदुगुलिं सगरमाथा भ्यू प्वाइन्ट, सगरमाथा सम्बन्धी अध्ययन केन्द्र, समुदायपाखें न्ह्यानाच्वंगु मञ्जुश्रीया प्रतिमा सहित आकर्षक पार्क व मञ्जुश्री अध्ययन केन्द्र, अन्तर्राष्ट्रिय स्तरया माउन्टेन बाइक साइक्लिंग ट्रेलर लिसें स्थानीय आवश्यकता कथं शैक्षिक संस्था व अस्पताल सञ्चालन यायेमाःगु खँय् बः बिउगु दु ।

अन्तक्र्रिया ज्याझ्वलय् न्ववासें वरिष्ठ वातावरणविद् भूषण तुलाधरं चोभाः स्वनिगःया लः निकास जुइगु व फय् वइगु लँपु जूगुलिं अन सुख्खा बन्दरगाह दयेके मजिउगु खँ कनादिल । किपू नपा ६ वडाया अध्यक्ष न्हुच्छेबहादुर महर्जनं अन प्रधानमन्त्रीं सुख्खा बन्दरगाह दयेकेत शिलान्यास यायेत्यंगु खःसां स्थानीय जनप्रतिनिधि उपस्थित मजुइगु हुनिं शिलान्यासया ज्या स्थगित जूगु खँ कनादिल ।