जनकवि दुर्गालाल श्रेष्ठया नामं चोक

येँ (नेपालभाषा टाइम्स)-नांजाःम्ह जनकवि दुर्गालाल श्रेष्ठया नामं येँया छगू दुवाःया नामकरण जूगु दु । थनया थँबही (ठमेल) लागाय् च्वंगु छगू व्यस्त दुवाःया नां ‘दुर्गालाल चोक’ तयेगु निर्णय यासें अन नांग्वरः समेत तयेगु ज्या जूगु दु ।

ठमेलया नरसिंह चोकं तप्यंक थँहितिइ वनेगु लँय् लाःगु जेपी स्कुल वनेगु स्वदुवाःयात ‘दुर्गालाल चोक’ नां तःगु खः । अनया छगू थामय् ह्याउँगु प्लेटय् ‘दुर्गालाल चोक’ नां च्वयातःगु ग्वरः यखानातःगु दु ।

जनकवि दुर्गालाल श्रेष्ठ जन्म जूगु छेँ न्हाय्कंत्वाःया चाबहाः खःसां लिपांगु इलय् वय्कः थँबहिली छेँ दनाः च्वनादीगु खः । वय्कलं थँबहीया उगु लागाय् जग्गा न्यानादीबलय् अन न्हिनय् हे ध्वं हाः वइगु धाइ । आः धाःसा उगु लागा पर्यटनया केन्द्र थें जुइधुंकूगु दु ।

नेपाःया काव्य ख्यलय् जनकवि श्रेष्ठं यानादीगु योगदानया कदर यासें स्थानीय ठमेल जागरण परिवारं उगु दुवाःया नां हे वय्कःया नामं नामकरण याःगु खः । थ्व नामं दुवाःया नामं समेत थःगु पहिचान प्राप्त याःगु खँ धाःगु दु ।