प्रदेश सरकार प्रभावित

येँ (नेपालभाषा टाइम्स)÷केन्द्रय् सत्ता समीकरण हिलेवं उकिया लिच्वः प्रदेश सरकारय् नं लायेगु शुरु जूगु दु । गण्डकी प्रदेशय् कांग्रेसया मुख्यमन्त्री सुरेन्द्रराज पाण्डें माओवादीया निम्ह मन्त्रीत बर्खास्त याःगु दुसा बागमतीया माओवादी सरकार संकटय् लाःगु दु ।

गण्डकीया मुख्यमन्त्री पाण्डें सामाजिक विकास मन्त्री सुशीला सिम्खडा व भौतिक पूर्वाधार यातायात मन्त्री रेशमबहादुर जुग्जालीयात म्हिगः पदं चीकूगु खः । वय्कःपिं
निम्हं माओवादीपाखें वःपिं खः । निगुलिं मन्त्रालयं मुख्यमन्त्री पाण्डें हे काःगु दु । केन्द्रय् समीकरण हिलेवं बागमती प्रदेशया सत्ता समिकरण नं हिलीगु सम्भावना अप्वया वःगु दु । ११० म्ह सांसद दुगु बागमती प्रदेशय् बहुमतया नितिं ५६ सिट माः । अन एमालेया २७, माओवादीया २१ सांसद दुसा कांग्रेसया ३७, एसया ७, राप्रपाया १३, नेमकिपा ३ व हाम्रो नेपाली पार्टीया निम्ह सांसद दु । आः अन राप्रपा निर्णायक पार्टी जुइगु अवस्था दु । केन्द्रय् बने जूगु न्हूगु समीकरणं यानाः थःगु सरकार संकटय् लायेवं बागमती प्रदेशया मुख्यमन्त्री शालिकराम जम्कट्टेल म्हिगः हे संघीय राजधानी येँय् थ्यंकः वःगु दु ।

उकथं हे कर्णाली प्रदेशय् सरकारय् दुथ्याःपिं कांग्रेसया स्वम्ह मन्त्रीतय्सं राजीनामा बिउगु दु । केन्द्रय् सत्ता समीकरण हिलेवं कर्णालीया सरकारं कांग्रेस पिहां वःगु खः । कर्णाली प्रदेश सरकारया उद्योग, पर्यटन, वन तथा वातावरण मन्त्री कृष्णकुमार बिसी, अर्थमन्त्री बेदराज सिंह व सामाजिक विकास मन्त्री खड्गबहादुर पोख्रेलं राजीनामा बिउगु खः ।

अथे हे सुदूरपश्चिम प्रदेशया मुख्यमन्त्री कमलबहादुर शाहं माओवादी केन्द्रया निम्ह मन्त्री व छम्ह राज्य मन्त्री बर्खास्त याःगु दु । उद्योग, पर्यटन, वन तथा वातावरण मन्त्री रमेश धामी, सामाजिक विकास मन्त्री झपट साउद व उद्योग राज्यमन्त्री गितादेवी मालयात सरकारं चीकूगु खः ।

१ नम्बर प्रदेश (कोशी) या सरकार छु जुइ धइगु खँ धाःसा धायेफइगु अवस्था मदुनि । अन सरकार नीस्वनेगु संविधानया अन्तिम विकल्प कथं धारा १६८ (५) कथं केदार कार्की मुख्यमन्त्री जुयादीगु खः । वय्कःयात कांग्रेसया च्याम्ह व एमालेया ३९ म्ह सांसदया समर्थन दु । मुख्यमन्त्री कार्कीयात अविश्वासया प्रस्ताव तयाः चीके फइगु सम्भावना म्हो जक दुगुलिं तत्काल ‘कोशी प्रदेशया मुख्यमन्त्रीयात हाथ्या मदुगु विश्लेषण नं यानाच्वंगु दु ।

वय्कःया विरुद्ध अविश्वासया प्रस्ताव वल हे धाःसां नं वय्कलं धारा १६८ (५) कथं मध्यावधि चुनावया घोषणा याये फइगु खँ विश्लेषकतय्सं धाःगु दु । मुख्यमन्त्री कार्कीं तत्काल राजीनामा मबीगु व विश्वासया मत नं मकायेगु रणनीति दयेकाच्वंगु दु ।