ने. सं. ११४४ ञलाथ्व दशमी -

झिंन्यान्हुया लागिं चिनियाँ नाका बन्द

येँ – कोरोना भाइरसं चीनय् महामारीया रुप कायेवं नेपाःया रसुवागढी नाकां चिनियाँ नागरिकयात दुहां वयेगु पनाबिउगु दु । बुधवाःनिसें झिन्यान्हु तकया लागिं रसुवागढी नाकां चिनियाँ नागरिकयात नेपाः दुहां वयेत पनागु खँ गृह मन्त्रालयं धाःगु दु । गृह मन्त्रालयया कथं नेपालं चीनपाखे वनेत नं प्रतिबन्ध तयातःगु दु ।

चीनया तिब्बतय् ल्होसार नखः न्ह्यानाच्वंगु लिसें कोरोना भाइरसया संक्रमण अप्वया वनाच्वंगुलिं रसुवागढी नाका बन्द याःगु खः । चीनय् कोरोना भाइरसया कारणं सीपिनिगु ल्याः १३२ म्ह थ्यनेधुंकूगु दुसा ५९७४ म्ह संक्रमण जूगु पुष्टि जुइधुंकूगु दु ।

चीन बाहेक हलिंया मेगु झिंखुगू देशय् नोवेल कोरोना भाइरसया संक्रमण लुइधुंकूगु दु । वंगु डिसेम्बरय् चीनया हुवेइ प्रान्तया वुहानय् न्हापांखुसी कोरोनाया संक्रमण खनेदुगु खः । उकथं हे चीनय् च्वनाच्वंपिं छुं नेपाःमियाके नं उगु भाइरस लूगु खँ धाःगु दु । चीनय् अध्ययन यानाः नेपाः लिहां वःपिं विद्यार्थीयाके उगु भाइरस लुइवं उमितं ‘आइसोलेसन’य् तयाः उपचार याःगु खः । उकी मध्ये छम्ह डिस्र्चाज जुइधुंकूगु दुसा मेपिं निम्हेसित आइसोलेसनय् तयाः वासः याकातःगु दु । चीनय् ब्वनाच्वंपिं विद्यार्थीतय्सं नेपाः लिहां वने न्ह्याःपिं नेपाःमितय्त स्वदेश लिहां वनेगु अनुमति बीत माग यानाच्वंगु दु ।

थ्वहे झ्वलय् चीनं कोरोना भाइरसं कःपिं विरामीतय् वासः यायेत अन खुन्हुया दुने हे छगू अस्पताल दयेकाः विश्वयात चकित याना बिउगु दु । चांन्हि छस्वाः जुइक दयेकूगु उगु अस्पतालय् छक्वलं द्वःछिम्ह विरामीया वासः यायेछिं ।