ने. सं. ११४४ कछलागा पारू -

थिमिइ छगू दशक लिपा नवदुर्गा प्याखं

थिमि – मध्यपुर थिमि नगरपालिकाय् वंगु छगू दशक न्ह्यवंनिसें दिनाच्वंगु ख्वपया नवदुर्गा द्यःया गंप्याखं थुगुसीनिसें हाकनं क्यंगु दु । मध्यपुर थिमि नगरपालिकाया प्रमुख मदनसुन्दर श्रेष्ठया विशेष कुतलय् ख्वपया नवदुर्गा द्यःया गंप्याखं क्यनेगु ज्या जूगु खः । ख्वपया धार्मिक व सांस्कृतिक ल्याखं अतिकं महत्व दुगु थ्व प्याखं थनिं छगू दशक न्ह्यःनिसें क्यनेगु ज्या दिनाच्वंगु खः ।

छगू दशक न्ह्यः थिमिया स्थानीयवासीतय्सं अय्लाः त्वनाः द्यःप्याखंया देवगणत अभद्र व्यवहार याःगु धासें सुरक्षाया कारण क्यनाः उगु प्याखं क्यनेगु ज्या बन्द जुयाच्वंगु खः । उगु इलय् देवगणयात अभद्र व्यवहार याःगु धासें दथुइ हे प्याखं क्यनेगु ज्या दिकाः लिहां वनेवं हाकनं उगु प्याखं क्यनेगु ज्या मजुयाच्वंगु खः ।

थुगुसी नगरपालिकाया प्रमुख श्रेष्ठं नवदुर्गा प्याखंया सुरक्षा लिसें प्याखंयात माःगु खर्चया नं व्यवस्था यायेगु प्रतिवद्धता प्वंकेवं वंगु थिंलाथ्व पुन्हि (यःमरिपुन्हि)निसें मध्यपुर थिमिइ हाकनं थ्व प्याखं क्यनेगु शुरु जूगु खः ।

प्याखं क्यनेगु निंतिं नगरप्रमुख श्रेष्ठलिसें वडा नं. ४ या अध्यक्ष कुमार श्रेष्ठं विशेष कुतः यानादीगु खःसा वयां लिपा मध्यपुर थिमि नगरपालिका व नवदुर्गा प्याखंया प्रतिनिधि दथुइ निगू बुँदाया सहमति जूगु खः । उगु हे सहमति कथं मध्यपुर थिमिइ छगू दशक न्ह्यवंनिसें बन्द जुयाच्वंगु नवदुर्गा द्यःया गंप्याखं थुगुसीनिसें हाकनं संचालनय् वःगु खः ।

‘नगरपालिका मध्यपुर थिमिया कला, संस्कृति व सांस्कृतिक पर्वयात ल्यंका तयेत बजेट हे विनियोजन यानाः न्ह्याः वनाच्वंगु दु’ नगरप्रमुख श्रेष्ठं धयादिल, ‘दँदँ न्ह्यवनिसें थिमिइ क्यनेगु याना वयाच्वंगु ख्वपया नवदुर्गा द्यःया गंप्याखं नं थनया सांस्कृतिक धरोहर हे खः ।’

न्हापां दिंकुन्हु थनया दिगुत्वालं शुरु जूगु थ्व प्याखं छवाःतकं क्यनेगु ज्या जुइसा थ्व झ्वलय् थिमि लाय्कू, दथुत्वाः, मरुत्वाः, ताच्व, तछुत्वा, पोबु, चपाच्व नगदेश, बोडेलिसें सूर्यविनायकया दधिकोट व गाम्चाय् नं क्यनेगु ज्या जुइ ।