जापानय् ख्वपया कुम्हाःतय् कलासम्बन्धी वृत्तचित्र
ख्वप(नेपालभाषा टाइम्स)- ख्वपया कुम्हाः (प्रजापति) समुदायया सीप व कला सम्बन्धी वृत्तचित्र जापानय् प्रदर्शन याःगु दु । जापानय् जूगु प्रदर्शनय् ख्वपया कुम्हाःतय् सीप कला सम्बन्धी वृत्तचित्र प्रदर्शन याःगु खः ।
नकतिनि क्वचाःगु स्वलायंकंया उगु प्रदर्शनीइ संजय महर्जनं निर्माण यानादीगु ‘जर्नी टु भक्तपुर’ नांया उगु वृत्तचित्र प्रदर्शन याःगु खः । उगु वृत्तचित्रय् ख्वपाय कलात्मक सम्पदा, कला, संस्कृति, जीवनशैली नं दुथ्याकातःगु दु ।
१७ डिसेम्बर, २०२२ निसें शुरु जूगु प्रदर्शनी वंगु १९ मार्च, २०२३ य् क्वचाःगु खः । जापानया ताकाहामा सहरय् च्वंगु कावारा म्युजियम अफ आर्टय् जूग प्रदर्शनीइ ‘जर्नी टु भक्तपुर ः द होम टाउन अफ नेप्लिज सेरामिक्स’ शीर्षकय् उगु वृत्तचित्रया प्रदर्शन याःगु खः ।
‘गो टु ट्र्राभल जर्नी अफ द अर्टिस’ शीर्षकया प्रदर्शनीइ फोटोग्राफर महर्जनं संकलन यानादीगु नेपाःया थीथीकथंया कलात्मक अप्पा, टाइललिसें वय्कः थम्हं कयादीगु फोटोया नं प्रदर्शन याःगु खः । महर्जनं प्रदर्शनीइ न्ह्यब्वयादीगु वृत्तचित्रय् ख्वपया पुलां पुलांगु मौलिक नेवाः शैलीया छेँ, छेँखाय् पल्लिइ छ्यलीगु आँय्पा, कलात्मक बुट्टा, बुट्टा दुगु अप्पा लिसें ख्वपया कुम्हाःतय्सं दयेकीगु चाभारा व मेमेगु हलंज्वलं सम्बन्धी खोजमूलक वृत्तचित्र प्रदर्शन याःगु खः ।
उगु वृत्तचित्रया छायाँकन, सम्पादन व निर्देशन दक्वं महर्जन स्वयं थम्हं यानादीगु खः । अथे खःसां उगु वृत्तचित्रयात अझ परिस्कृतलिसें उपयोगी जुइमा धइगु ल्याखं वरिष्ठ आर्किटेक्चर विजय वासुकाल, इँट्टा टायल शिल्पकारलिसें व्यवसायी कर्ण अवालें नं माःकथं ग्वाहालि यानादीगु खः । वय्कःपिंसं परम्परागत तरिकां अप्पा दयेकेगु विधि व उकियात जीवन्त याना तयेत छु यायेमाः धइगु बारे थप तथ्यसहितया विशेषज्ञतय् धारणायात नं दुथ्याकादीगु दु ।
नेपाः व जापान दथुइ सांस्कृतिक सम्बन्धयात क्वातुकेगु ज्याय् न्ह्यचिला च्वनादीम्ह सुन्दरी मिकाया नामं म्हसिउम्ह जापानी म्येँ हालामि ताकागि मिकां उगु वृत्तचित्र निर्माण यानादीगु खः । प्रदर्शनीया अवलोकन यायेत वःपिं आपालं थें स्वकुमि व जापनीतय्सं जक मखु जापानी विद्यार्थीतय् निंतिं वृत्तचित्र उपयोगी जूगु प्रतिक्रिया बिउगु दु । थ्व हे कारणं ताकाहामा सहरया म्युजियमय् प्रदर्शनी क्वचाःसां आः उकियात टोकियो, ओसाका, ओकिनावा लगायतया सहरय् नं प्रदर्शन यायेगु तयारी जुयाच्वंगु दु ।
थ्व हे झ्वलय् थुगु दँय् जुइगु यामागाता अन्तर्राष्ट्रिय वृत्तचित्र तथा फिल्म महोत्सवय् नं उगु वृत्तचित्र दुथ्याकेगु तयारी जुयाच्वंगु सीदुगु दु । ज्ञानमाला सांस्कृतिक प्रतिष्ठानया प्रशिक्षकलिसें वाद्यवादक महर्जनं थःगु न्हापांगु वृत्तचित्रय् अन्तर्राष्ट्रिय ख्यलय् प्रदर्शन जूगु जक मखु उकिया अवलोकनकर्तातय्सं नं ययेकाः बांलाःगु प्रतिक्रिया बिउगुलिं थः उत्साहित जूगु खँ कनादीगु दु ।
जापान भ्रमणया झ्वलय् वय्कलं फुकुयामा म्युजियम, क्योटो नेपाली रेष्टुरेण्ट व शिगा गेष्ट हाउसय् जुइगु कन्सर्टय् म्येँ हालामि मिका सुन्दरी व सुन्दरी ब्याण्डलिसें नेपालभाषा, नेपाली व जापानी भाय्या म्येँ न्ह्यब्वयेगु ज्याझ्वः दुगु नं वय्कलं जानकारी बियादीगु दु ।
थुकथं हे थुगु दँय् जुइगु ओरिअन कन्सर्टय् ब्वति कायेगु नापनापं वृत्तचित्र व फोटो प्रदर्शनी लगायतया ज्याझ्वः यायेगु व उकिया निंतिं जापान सरकारया परराष्ट्र मन्त्रालयं तकं स्वीकृति बी धुंकूगु जानकारी वय्कलं बियादिल ।
LEAVE YOUR COMMENTS