काठमाडौं विश्वविद्यालयय् शिल्पकलाया स्नातक कक्षा सुरु
येँ (नेपालभाषा टाइम्स)- काठमाडौं विश्वविद्यालयं शिल्पकला नं ब्वंकेगु सुरु याःगु दु । विश्वविद्यालयं शिल्प व डिजाइन शिक्षाय् स्नातकया कक्षा सुरु याःगु दु । बिहिविाः निसें सुरु जूगु थ्व विषय नेपालय् हे न्हापांखुसी ब्वंकेगु सुरु जूगु खः । प्यदँया थ्व कोर्सय् थुगुसी नीम्ह विद्यार्थी भर्ना जूगु खँ धाःगु दु ।
शिल्प कला ब्वंकेगु सुरु यायेगु ज्याझ्वलय् न्ववानादिसें काठमाडौं विश्वविद्यालयया उपकुलपति प्रा. डा. भोला थापां थःपिंसं छुं न्हूगु ज्या यानागु मखसे पुर्खा व समुदायं याना वयाच्वंगु ज्यायात जक छुं न्हूगु पह बीत्यनागु खँ धयादिल । रैथान कला, पम्परागत कला, ज्ञान व शीपयात स्वानाः न्ह्याःवनेगु कुतः जुइगु खँ वय्कलं धयादीगु दु ।
ज्याझ्वलय् न्ववानादिसें बागमति प्रदेशया उद्योग वाणिज्य, भूमि व प्रशासनमन्त्री रामकृष्ण चित्रकारं नेपाल ललितकला प्रज्ञा प्रतिष्ठानलिसेया सहकार्यय् काठमाडौं विश्वविद्यालयं शिल्पकलाया पठनपाठन सुरु यानाः कला क्षेत्रय् विकासय् योगदान बिउगु खँ धयादिल । थ्व झ्वलय् वय्कलं प्रदेश सरकारं नं कलाया विकासया निंतिं प्राथमिकता बियाः आः प्रदेश संसदय् हस्तकला विधेयक न्ह्यब्वये धुनागु खँ कनादिल ।
अथेहे नेपाल ललितकला प्रज्ञा प्रतिष्ठानया कुलपति नारदमणि हार्तम्छालीं शिल्प व डिजाइन कलाय् स्नातक तक ब्वंकेगु सुरु जूगु धयागु ललितकला क्षेत्रया निंतिं उपलब्धी जूगु धयादिल । वय्कलं ललितकला विकासया निंतिं प्राज्ञिक क्षेत्रय् हे परम्परागत कलाया शिक्षा बीगु तसकं महत्वपूर्ण जूगु खँ धयादिल ।
LEAVE YOUR COMMENTS