जम्मरकट्टेलं विश्वासया मत काइगु

येँ (नेपालभाषा टाइम्स)- बागमति प्रदेश सरकारया मुख्यमन्त्री शालिकराम जम्मरकट्टेलं थ्वहे वइगु चैत ८ गते विश्वासया मत काइगु जूगु दु । उकिया नितिं प्रदेशसभा सचिवालयं वकुन्हु हे प्रदेश सभाया बैठक सःतूगु दु ।

संघीय सरकारय् गठबन्धन हिलेवं राष्ट्रिय प्रजातन्त्र पार्टीं सरकार त्वःताः बागमति प्रदेशय् नं थःपिनि स्वम्ह मन्त्री लित सःतूगु खःसा सरकारयात बियातःगु समर्थन नं लित धाःगु खः । थुकिं यानाः जम्मरकट्टेलया सरकार अल्पमतय् लाःगु खः ।

वंगु पुस २६ कुन्ह बागमति प्रदेशय् सरकार दयेकूबलय् नेकपा (एमाले), नेकपा माओवादी केन्द्र व राप्रपाया मंकाः गठबन्धन जूगु खः । बागमति प्रदेशया मन्त्रिपरिषदय् आः माओवादी केन्द्र व एमालेया जक मन्त्री दु ।

थ्वहे झ्वलय् आः एमालें नं बागमति प्रदेशय् सरकार त्वःतेफइगु खँ धाःगु दु । एमालें सरकार त्वःताः सरकारयात बियातःगु समर्थन लित काःसां मुख्यमन्त्री जम्मरकट्टेलयात विश्वासया मत धाःसा चूलाइगु खनेदु । प्रदेशया आन्तरिक मामिला मन्त्री गंगानारायण श्रेष्ठं ‘नेपालभाषा टाइम्स’ लिसे खँ ल्हासें प्रदेशय् आः बने जुइगु न्हूगु गठबन्धनयात विश्वासया मत वइगु दावी यानादिल । वय्कलं धयादिल, ‘एमालें विश्वासया मत मबिउसां मुख्यमन्त्रीयात विश्वासया मत वइ ।

बागमति प्रदेशया ११० सिटय् कांग्रेसया ३७, माओवादीया २१ व नेकपा एकीकृत समाजवादीया ७ सिट दु । उकथं हे नेकपा एमालेया २७, राप्रपाया १३, नेमकिपा ३ व हाम्रो नेपाली पार्टीया २ सिट दु ।