मानन्धर संघया २९ क्वःगु तःमुँज्या न्हूम्ह सभापति ल्यल
येँ- केन्द्रीय मानन्धर संघया २९ क्वःगु तःमुँज्याय् संघया न्हूम्ह सभापतिइ मनोजकुमार मानन्धर निर्विरोध निर्वाचित जुयादीगु दु । वंगु शनिवाः थनया मरुहिति ब्यांक्वेटय् जूगु तःमुँज्यां वीरगंजया पर्सौनी मानन्धर गुथिया नायः मानन्धरयात न्हूम्ह सभापतिकथं ल्यःगु खः ।
थ्व स्वयां न्ह्यः संघया सभापति गोपालकृष्ण मानन्धरया सभापतित्वय् जूगु तःमुँज्याया उलेज्या मूपाहां मानन्धर समुदायया दकलय् ज्याथम्ह १०४ दँ दुम्ह ललितमान मानन्धरं संघया संस्थापक सभापति देवीदास मानन्धरया किपाय् स्वां देछासे त्वाःदेवाय् मत च्याकाः यानादीगु खः ।
संघया उपसभापति बद्री नारायण मानन्धरं लसकुस यानादीगु ज्याझ्वलय् सचिव गजेन्द्रमान मानन्धरं वार्षिक प्रगति प्रतिवेदन व कोषाध्यक्ष सन्देश मानन्धरं वार्षिक आय–व्यय विवरण न्ह्यब्वयादीगु खः । निगुलिं प्रतिवदेनयात कयाः व्यापक सहलह लिपा सर्वसम्मतं पारित याःगु खः ।
प्रतिवेदनयात कयाः लक्ष्मीदास मानन्धर (थँहिति), धर्मकृष्ण मानन्धर (भिंद्यः गुथिं, लक्ष्मीदास मानन्धर (न्हूसाः), गौतम मानन्धर (पाक्व), सुवर्ण साय्मि (पाक्व), धर्म मानन्धर (किपू), तुल्सी मानन्धर (मरुध्वाखा)पिंसं थीथी न्ह्यसःलिसे जिज्ञासा व वइगु दिनय् संघपाखे यायेमाःगु थीथी ज्याझ्वःयात कयाः सुझाव बियादीगु खः ।
तःमुँज्याया हे झ्वलय् मय्जु शान्ति मानन्धर (तंलाछि)पाखें बीबीएस तगिमय् उत्कृष्ट ल्याः हःपिंम्हमध्ये मिसा छम्ह व मिजं छम्हेसित सिरपाः लःल्हायेगु ल्याखं थः मदुम्ह माजु हेरादेवी व मदुम्ह जहान योगमान (सानुकाजी) मानन्धरया नामं छगू लाखया कोष, भाजु सत्यनारायण मानन्धर, भाजु जगदीशनारायण मानन्धर व भाजु माधवनारायण मानन्धर (लाय्कूसाः)पाखें थः मांअबुया नामं बेखानारायण–देवकुमारी राष्ट्रिय प्रतिभा कोषया निंतिं न्यागू लाख तका व भाजु दीपक मानन्धर व मय्जु प्रतिसरा साय्मि (दैसाः) पाखें थः मदुम्ह छय्या नामं विभूषणनारायण लुमन्ति कासा सिरपाःया निंतिं न्यय्द्वः तका दां संघयात लःल्हानादीगु खः ।
ज्याझ्वःया सभापति गोपाल कृष्ण मानन्धरं सुभाय् देछानादीगु ज्याझ्वलय् नवनिर्वाचित सभापति मनोजकुमार मानन्धरं थःगु नुगःखँ तयादीगु खः ।
भाजु हरिओम मानन्धरया संयोजकत्वय् प्रा. डा. त्रिरत्न मानन्धर, मय्जु पंचकुमारी मानन्धर, भाजु उत्तम मानन्धर व भाजु राधाकृष्ण मानन्धर दुथ्याःगु निर्वाचन कमिटी गठन याःगु खः ।
LEAVE YOUR COMMENTS