प्रेस काउन्सिलया छुं नं नियम व कानून रोके याये मखु
येँ – संचार व सूचना प्रविधिमन्त्री गोकुलप्रसाद बाँस्कोटां प्रेस काउन्सिल नेपालं हःगु छुं नं नियम व कानून रोके मयासे फक्व याकनं कार्यान्वयनय् यंकेगु जुइ धयादीगु दु । लिसें वय्कलं छवाःया दुने उपलब्धिमूलक ज्याझ्वः दयेकाः छ्वया हयेत नं काउन्सिलयात इनाप यानादीगु दु । प्रेस काउन्सिल नेपालया वार्षिक समीक्षा बैठकय् नवासें मन्त्री बाँस्कोटां उगु खँ धयादीगु खः ।
बैठकय् प्रेस काउन्सिल नेपालया कार्यवाहक अध्यक्ष किशोर श्रेष्ठं काउन्सिलयात अझ प्रभावकारी ढंगं न्ह्यःने यंकेमाःगु खँ धयादिल । आतकया दुने तयार जूगु ऐन, निर्देशिका, विनियमावली याकनं स्वीकृत यायेमाःगु, आकिवं काउन्सिलया स्वर्ण जयन्ती जूगुलिं तःजिक हनेगु जुइ धासें आः खने दयाच्वंगु समस्या, समाधानया उपाय व मन्त्रालयंं यानाच्वंगु अपेक्षाया बारे धारणा तयादीगु खः ।
उगु वार्षिक समीक्षा बैठकय् काउन्सिलया मुख्य अधिकृत झविन्द्र भुषालं कार्य प्रगति विवरण न्ह्यब्वयादिसें काउन्सिलया भौतिक सम्पत्ति, आर्थिक दँ ०७५÷७६ या नीतिगत, कानूनी उपलब्धि, लिपांगु निदँया दुने जूगु उपलब्धिलिसें वइगु दँया ज्याझ्वःयात कयाः कुलादीगु खः ।
उगु इलय् बोर्डया दुजःपिंसं प्रादेशिक रुपय काउन्सिलया ज्याकू चायेकाः उखें हे अनुमगन यायेमाःगु, मन्त्रालयपाखें दिनाच्वंगु ज्या याकनं न्ह्यःने यंकेमाःगु लगायतया धारणा तयादीगु खः । समीक्षा बैठक साहित्यिक पत्रकारतलिसे जूगु सहलहया इलय् साहित्यिक पत्रकारिताया समस्या मन्त्रालयं ज्यंकेत पहल यायेत नं इनाप याःगु खः ।
LEAVE YOUR COMMENTS