ख्वप इन्जिनियरिंग कलेजया विद्यार्थीतय् प्रस्तुतिकरण

थिमि – ख्वप इन्जिनियरिंग कलेजय् वास्तुशास्त्र अध्ययन यानाच्वंपिं न्याम्ह विद्यार्थीं मध्यपु थिमिया दिगु त्वाः व सिभा त्वालय् अध्ययन अनुसन्धानयाइलय् याःगु विषयात कयाः प्रस्तुतिकरण बिउगु दु ।

मध्यपुर इन्जिनियरिंग समाजया ग्वसालय् जूगु ज्याझ्वलय् कलेजय् ब्वनाच्वंपिं छात्रापिं कल्पना कार्की, रोजिना शिवहरि, शर्मिला सुजखु व स्मृति लामा व छात्र श्रीजन मुस्याजुं निगुलिं त्वालय् च्वंगु देगः, सतः, फल्चा, ल्वहंहिति, दबू, शिवलिंगया ऐतिहासिक पक्षयात कयाः अध्ययन अनुसन्धान याःगु खःसा उकियात हे कयाः इमिसं थःथःगु प्रस्तुतिकरण बिउगु खः ।

समाजया अध्यक्ष सूर्यबहादुर प्रजापतिया सभापतित्वय् जूगु ज्याझ्वलय् मूपाहां मध्यपुर थिमि नगरपालिकाया प्रमुख मदनसुन्दर श्रेष्ठं गुगुं कलेजया विद्यार्थीत मध्यपुर थिमि नगरपालिकाय् अध्ययन अनुसन्धान यायेत वइगु इलय् नगरपालिकाय् स्वापू तयाः यात धाःसा नगरपालिकां उकिया निंतिं जुइगु मसलन्द खर्च व्यहोरे यायेगु जुइ धयादिल ।

लिसें वय्कलं मध्यपुर थिमिया विद्यार्थीतय्त नगरपालिकाय् ज्या यायेत नं अपिल यानादिल । कलेजया विद्यार्थीतय्सं निगू पुचः दयेकाः दिगु त्वाः व सिभा त्वाःलिसें लाय्कूया विषयय् अध्ययन याःगु खः । अध्ययन लिपा इमिसं थःपिंसं खंगु, थुइका काःगु व पत्ता लगे याःगुयात हे प्रस्तुतीकरण बिउगु खः ।

उगु हे ज्याझ्वलय् थिमिया विषयय् ताःहाकःगु अध्ययन यानादीम्ह नापं विद्यावारिधी तकं प्राप्त यानादीम्ह प्रो मोहनमूर्ति पन्तयात समाजपाखें मानार्थ सदस्यता बिउगु खःसा अध्ययन अनुसन्धानय् संलग्न विद्यार्थीपिंत नं दसिपौ लःल्हाःगु खः । अध्ययन लिपा उगु प्रतिवेदन नगरप्रमुख श्रेष्ठयात लःल्हाःगु खः ।

ज्याझ्वलय् ख्वप कलेजया प्रा. कृष्णगोपाल प्रजापति, प्रा. रशिसलाल श्रेष्ठ, जिल्ला समन्वय समितिया दुजः उमेश श्रेष्ठ, युएन हाविटेडया पियुस जोशी, प्रो. पन्तं थःथःगु धारणा तयादीगु खः ।