फास्ट ट्र्याकया जिरो प्वाइन्ट हाकनं ख्वनाय्

येँ – येँ-निजगढ स्वाइगु फास्ट ट्रायकया जिरो प्वाइन्ट आःहाकनं ख्वकनाय् हे दयेकीगु जूगु दु । बुंगय् फास्ट ट्र्याकया जिरो प्वाइन्ट तलधाःसा थःपिनि क्षेत्रया विकासय् लिच्वः लाइगु धासें ख्वनाया ३ सयम्ह स्थानीय जनतां रक्षा मन्त्रालयय् निवेदन बियाः ख्वनाय् हे जिरो प्वाइन्ट दयेके माः धकाः माग यायेवं वंगु असार १५ गते रक्षामन्त्रीया उपस्थितिइ रक्षा, भौतिक तथा पूर्वाधार मन्त्रालय व गृह मन्त्रालयया सचिवस्तरीय बैठक यानाः पुलांगु हे निर्णय कथं ख्वनायात हे जिरो प्वाइन्ट दयेके गु निर्णय याःगु खः ।

ख्वनाय् हे जिरो प्वाइन्ट दयेकेगु कथं वंगु असार १९ गते सुचं नं पिथने धुंकूगु दु । थ्व स्वयां न्ह्यः ख्वनाया जनतां फास्ट ट्रायक खोनाय् तयेदइ मखु धकाःविरोध याःगु खःसा उगु विरोध लिपा फास्ट ट्रायक बुंगया फर्सिडोलय् दयेकेगु धकाः सरकारं निर्णय याःगु खः । बुंगयाजनतां नं फर्सिडोलय् जिरो प्वाइन्ट दयेकेगु खँय् सहमति क्यंगु खः ।

बुंगया फर्सिडोलय् फास्ट ट्र्याकया जिरो प्वाइन्ट दयेकल धाःसा ख्वना व बुंगया यानाः २ हजार रोपनी जग्गा बचे जुइगु खँ बुंगमति सरो कार समितिया दुजः इन्द्रमान तुलाधरं ‘नेपालभाषाटाइम्स’ यात कनादीगु दु ।

ख्वनाय् हे फास्ट ट्र्याक दयेकल धाःसा ख्वना व बुंगया आपालं जग्गा लाइगु खँ वय्कलं कनादीगु दु । मेखे न्हापा ख्वनाय् जिरो प्वाइन्ट तये धाःबलय् मजिउ धकाः हाला जूपिं ख्वनाया वासिन्दां क्यनाच्वंगु द्वैध चरित्रं यानाः नं फास्ट ट्र्याक दयेके ज्याय् लिच्वः लानाच्वंगु स्थानीय वासिन्दां द्वपं बिउगु दु ।

सहमतिकथं अप्वः मुआब्जा मबीगु

स्थानीय वासिन्दा व सरकार दथुइ सहमतिजू कथं ये–निजगढ फास्ट ट्र्याकय् अप्वः मुआब्जा मबीगु जूगु दु । स्थानीय वासिन्दा
इन्द्रमान तुलाधरं वंगु असार १९ गते सरकारं पिथंगु सुचं कथं अप्वः मुआब्जा मवइगु खँ धयादीगु दु ।

रक्षामन्त्री ईश्वर पोखरेल, सेना व स्थानीय वासिन्दाया दथुइ अध्ययन यानाः मुआब्जा अप्वयेकेगु बारे सहमति जूगु खः । थ्व लिपा सेनां अध्ययन यानाः जग्गाया मुआब्जा अप्वयेके माःगु प्रतिवेदन रक्षा मन्त्रालयय् छ्वःगु खःसां रक्षामन्त्री पोखरेलसहित च्वंगु सचिवस्तरीय बैठकं मुआब्जा अप्वयेके म्वाःगु निर्णय याःगु खः ।

फास्ट ट्रायक दयेकेगु झ्वलय् बुंगया ७११ गू कित्ता जग्गा अधिग्रहण याःगु खःसा आः मुआब्जा काये ल्यंदनिपिं मनूत म्हो जूगुलिं मुआब्जा अप्वयेके म्वाःगु निर्णय याःगु खँ भाजु तुलाधरं कनादीगु दु । वय्कलं बियादीगु जानकारी कथं आः ४० निसें ५० कित्ता जग्गाया जक मुआब्जा काये ल्यं दनि ।अप्वः धयाथें बुँथुवाःतय्सं मुआब्जा कयातये धुंकूगुलिं यानाः थःपिं नं मुआब्जा कायेत बाध्य जुयाच्वंगु खँ नं वय्कलं धयादीगु दु ।