चिनियाँ नेताया अर्थपूर्ण भ्रमण

येँ (नेपालभाषा टाइम्स)÷चिनियाँ कम्युनिष्ट पार्टी (सीपीसी) या न्हू नियुक्त जुयादीम्ह विदेश विभाग प्रमुख लिउ जियानचाओ प्यन्हुया नेपाः भ्रमण यायेगु झ्वलय् म्हिगः येँय् वःगु दु । जियानचाआेंरि म्हिगः येँय् थ्यनेवं हे प्रधानमन्त्री शेरबहादुर देउवायात नापलानादीगु खःसा थौं राष्ट्रपति विद्यादेवी भण्डारी लिसें माओवादी केन्द्रया अध्यक्ष पुष्पकमल दाहाल व एमालेया अध्यक्ष केपी शर्मा ओलीयात नं नापलायेत्यंगु दु ।

नेपालं एमसीसी पात यायेधुंकाः चीनपाखें जूगु थ्व निगूगु उच्चस्तरीय भ्रमण खः । वंगु चैतया निगूगु वालय् तिनि चिनियाँ विदेशमन्त्री वाङ यीं नेपाः भ्रमण यानादीगु खः । वयांलि नेपालं अमेरिकाया स्टेट पार्टनरसिप प्रोग्राम (एसपीपी) अस्वीकार यायेधुंकाः थ्व हानं मेगु चिनियाँ पुचलं नेपाः भ्रमण यानाच्वंगु खः ।

न्हापा नेपाः वइबलय् थनया कम्युनिष्ट पार्टीया नेतातय्त जक नाप लाइपिं चिनियाँ नेताय्सं आः धाःसा नेपाली कांग्रेस लिसे नं सम्बन्ध क्वातुकेगु कुतः यानाच्वंगु खँ धाःगु दु । प्रमुख जियानचाओ व उपप्रमुख चेन झोउ छुं न्हिं न्ह्यः जक माओवादी, एमाले व कांग्रेसया नेतातलिसे बेइजिङं भच्र्युअल संवाद यानादीगु खः ।

जियानचाओ नेतृत्वया चिनियाँ पुचलं वंगु असार ९ गते माओवादी केन्द्रया अध्यक्ष पुष्पकमल दाहाल व १० गते एमाले अध्यक्ष केपी ओलीलिसे बिस्कं बिस्कं भच्र्युअल संवाद यानादीगु खःसा असार १६ गते नेपाली कांग्रेसया नेता लिसे परराष्ट्रमन्त्री नारायण खड्कालिसे निगू पक्षीय भच्र्युअल संवाद यानादीगु खः ।

चिनियाँ नेताया थ्व नेपाः भ्रमणयात कुटनीतिक ख्यलं आः याकनं जुइत्यंगु प्रधानमन्त्री शेरबहादुर देउवाया अमेरिका भ्रमण जक मखु, आः नेपालय् याकनं जुइत्यंगु संसदीय चुनावय् नेपाःया वामपन्थीत छप्पँ जुयाः ल्वाकेगु उद्देश्यं नं जूगु खः धयाहःगु दु ।

आरजु देउवा धाःसा न्हूदिल्लीइ
चिनियाँ कम्युनिष्ट पार्टीया विदेश विभाग प्रमुखे नेपाः वयाच्वंगु इलय् लाक्क प्रधानमन्त्री शेरबहादुर देउवाया जहान लिसें पार्टीया केन्द्रीय दुजः आरजु देउवा धाःसा ‘आकाझाकां’ भारतया न्हूदिल्ली वंगु दु । वय्कः वासः याकेगु त्वहः चिनाः न्हूदिल्ली वंगु खःसां अन भारतीय नेतात नं नापलाइगु सम्भावना दुगु खँ धाःगु दु । वंगु लछि न्ह्यः जक वय्कः किजाया वासः याकेगु त्वहः चिनाः न्हूदिल्ली झाःगु खःसा अन थ्यंकाः सत्तारुढ दल भाजपाया नेतातय्त नापलानादीगु खः । आरजुं भारतीय राजनीतिक नेतात नापलाःगु खँय् अबलय् कांग्रेस दुने नं विवाद पिहां वःगु खः । सूत्रतय्सं धाः कथं नेतृ देउवाया थ्व भारत भ्रमण प्रम देउवाया अमेरिका भ्रमणलिसे सरोकार दयेफुगु सम्भावना दु ।