एटीएम लुटे याइपिं चिनियाँत
येँ – येँय् च्वंगु थीथी बैंकया एटीएमपाखें चछिया दुने फुक्क हे ध्यबा लिकायेगु योजना ज्वनाः चिनियाँ नागरिकत येँय् वःगु खँ सीदुगु दु । चिनियाँ नागरिकतय्सं प्यम्ह प्यम्हेसिया निगू पुचः शनिवाः न्हिनय् व चान्हय् फुक्कं एटीएमपाखें ध्यबा लिकायेगु योजनां कथं नेपाः थ्यंकः वःगु खः । उगु योजना उमिसं चीनं हे दयेकाः वःगु सीदुगु दु तर थुपिं छगू पुचलं मेगु पुचःयात म्हमसिउगु खँ प्रहरीं धाःगु दु । तर उपिं निगुलिं पुचः छगू हे इलय् नेपाः वःगु खः ।
एटीएमं ध्यबा लिकाःपिं चिनियाँ नागरिकं छगू एटीएमय् दुगु फुक्कं ध्यबा लिकायेधुंकाः मेगु एटीएमय् वनाः हाकनं उकथं हे ध्यबा लिकाःगु खः । उमिसं शनिवाः न्हिनय् व चछि राजधानीया फुक्कं एटीएम बुथं ध्यबा लिकयाः आइतवाः क्यासिनो वनेगु व सोमवाः चीन लिहां वनेगु योजना दयेकूगु जुयाच्वन ।
प्रहरीया कथं निगुलिं पुचःया गतिविधियात स्वयेबलय् उपिं मेम्ह सुं व्यक्तिया निर्देशनय् नेपाः वयाः उगु ज्या याःगु अनुमान जुयाच्वंगु दु । एटीएम लुटे यायेगु योजना कथं शनिवाः न्हिनय् दरवारमार्गया नबिल बैंकया एटीएम बुथय् मनूतय्गु अस्वाभाविक चहल पहल जुयाच्वंगु खँ प्रभु बैंकया अप्रेसन अफिसरं प्रहरीयात फोन यानाः जानकारी याकल ।
प्रहरी परिसर सहित दरवारमार्ग, सोह्रखुट्टे व कमलपोखरी प्रहरी वृत्तपाखें प्रहरी परिचालन जुल । प्रहरी नबिल बैंकया एटीएम बुथ थ्यंबलय् छम्ह चिनियाँ नागरिक एटीएमं ध्यबा लिकयाच्वंगु खः । उम्ह चिनियाँ पिहां वयेवं वयात प्रहरीं ज्वन । वयागु झोला खानतलासी याःबलय् ४५ हजार तका ध्यबा व २० गू एटीएम कार्ड लुइकल । लिसें वयाके माया मनोहर बुटिक होटलया ताःचाः नं लुत । तत्काल प्रहरी होटलपाखे वन ।
अन प्यम्ह चिनियाँ नागरिक निगः सुटकेश व निपाः झोला ज्वनाः होटलं पिहां वयाच्वंगु लुत । एटीएम बुथं काःगु सीसीटिभीया फुटेजय् उमिगु ख्वाः ज्वः लायेवं प्रहरी उमित ज्वनाः होटलया कोथाय् वन । अन प्रहरीं नेपाःया नोटया लिसें थीथी देय्या नोट नं बरामद यात ।
नबिल बैंकया एटीएम बुथं चिनियाँतय्त ज्वनेवं जःखः दुपिं स्वम्ह चिनियाँत होटलय् बिसिउँ वंगु खःसा अनं हे उमित ज्वन । प्रहरीया कथं होटलय् च्वंपिं मेपिं चिनियाँ नागरिक धाःसा बिसिउँ वनेत ताःलाःगु दु । म्हिगः ज्वंपिं चिनियाँतय्त प्रहरीं सार्वजनिक याःगु दु । प्रहरीं छम्हेसित एटीएम बुथ व प्यम्हेसित होटलं ज्वंगु खः । ज्वंपिं चेन विन विन, झु लियाङ आङ, क्यु याङयिङ, लु जियालिङ व लिन जिनमिङ जूगु खँ प्रहरीं धाःगु दु । प्रहरीं १ करोड २६ लाख ४५ हजार
नेरु नं बरामद याःगु खः ।
नेपाल राष्ट्र बैंकया कथं १ करोड ६८ लाख ५४ हजार तका बैंकिङ प्रणाली नोक्सान जूगु दु । नेपाल राष्ट्र बैंक व नेपाल बैंकर्स संघं सर्वसाधारणया निक्षेप सुरक्षित जूगु खँ धाःगु दु । म्हिगः जूगु जोखिम बैंकतय्सं हे व्यहोरे याइगु खँ नेपाल बैकर्स संघं धाःगु दु । बैंकतय्त म्हिगः ४० लाख तकाया नोक्सान जूगु खः ।
LEAVE YOUR COMMENTS